Kraysler-bilding sotilganidan keyin uning toji sayqallanadi
Manhettenning oʻziga xos osmonoʻpar binosi kapital taʼmirlanadi va yangi idoralar zaxirasini taqdim etadi.
Kraysler-bilding (Chrysler Building) sotilganidan keyin uning toji sayqallanadigan boʻldi
Manhetten ufqidagi eng taniqli minoralardan biri boʻlgan Kraysler-bilding koʻp million dollarlik oldi-sotdi shartnomasi doirasida yirik taʼmirlashdan oʻtkaziladi.
Nyu-Yorkda deyarli 100 yil avval ochilgan osmonoʻpar binoning Art Deko uslubidagi toji sayqallanadi va qayta tiklanadi, shuningdek, taʼmirlash ishlari binoning 77 qavatli fasadini ham qamrab oladi.
Tishman Speyer developerlik kompaniyasi ijara huquqini Cooper Union xususiy kollejidan (Ilm-fan va sanʼatni rivojlantirish boʻyicha Kuper Ittifoqi) qabul qilib oldi.
Tishman Speyer va uning hamkorlari loyihaga 235 million dollar (178 million funt sterling) sarmoya kiritadi, bu mablagʻ evaziga ulkan burgut garguliyalari va «hashamatli» dam olish hududi joylashgan 61-qavat ham yangilanadi.
Developer Grand Sentral (Grand Central) temir yoʻl vokzali yaqinida joylashgan binoning katta qismidan ofis maydoni sifatida foydalanishni rejalashtirmoqda. U kompaniyalarga oʻzlarining yangi joylariga tezkorlik bilan koʻchib oʻtish imkonini beruvchi, oʻzi «tayyor qurilish yondashuvi» deb taʼriflagan usulni qoʻllamoqda.
Tishman Speyer ushbu hudud «Manhettendagi eng past boʻsh ofis maydonlari koʻrsatkichiga ega» ekanini taʼkidlab, shunday qoʻshimcha qildi: «Bu mahallada oʻnlab yillar davomida yangi ofis maydonlarini qurish deyarli amalga oshirilmagan».
Taʼmirlash ishlari ichki ishlarni ham qamrab oladi, jumladan, binoning mexanik, lift, elektr va havo aylanish tizimlari yangilanadi.
Balandligi 1046 fut (319 metr) boʻlgan Kraysler-bilding bir vaqtlar dunyodagi eng baland bino boʻlgan — toki bir yildan kamroq vaqt oʻtgach, yaqin atrofdagi Empayr-steyt-bilding (Empire State Building) undan oʻzib ketgunga qadar.
Avtomobil magnati Uolter Kraysler tomonidan moliyalashtirilgan osmonoʻpar bino qurilishi 1928 yilda boshlangan va ikki yildan keyin yakunlangan.
Arxitektor Uilyam Van Alen burgut garguliyalarini 1929 yilgi Kraysler avtomobilining kapot bezaklari asosida loyihalashtirgan.
Bitiruvchilari qatoriga ixtirochi Tomas Edison ham kiradigan Cooper Union kolleji Kraysler-bilding ostidagi yerga 1902 yildan beri egalik qiladi.
Bu yer unga 1859 yilda kollejga asos solgan ishlab chiqaruvchi va sanoatchi Piter Kuperning farzandlari tomonidan vasiyat qilib qoldirilgan.
Kelishuvga koʻra, Tishman Speyer Cooper Union kollejiga yer ijarasi toʻlovlarini amalga oshiradi, kollej esa bu mablagʻlarni «barcha bakalavriat talabalari uchun toʻliq oʻqish stipendiyalarini qayta tiklash boʻyicha jasoratli rejani» moliyalashtirishga yoʻnaltirmoqchi.
Cooper Union prezidenti Stiven Maklaflin shunday dedi: «Ushbu kelishuvning ahamiyati, pirovardida, Cooper Union talabalarining avlodlari uchun qanday imkoniyatlar yaratishi bilan bogʻliqdir».