Krasnoyarskda ayiqlar bir oyda yetti kishini oʻldirdi. Mansabdorlar beparvoligi boʻyicha jinoyat ishi ochildi
Krasnoyarskda ayiqlar bir oy ichida yetti kishini oʻldirdi. Mansabdorlarning beparvoligi yuzasidan jinoyat ishi ochildi
Rossiyaning Krasnoyarsk oʻlkasidagi Voznesenka qishlogʻida ayiq 51 yoshli ayolni oʻldirdi.
Hududiy Tergov qoʻmitasi bergan maʼlumotga koʻra, 25-sentyabr kuni hovliga chiqqan ayol uy hayvonlari saqlanadigan qoʻraga kirishga urinayotgan ayiqni ko‘rgan. Yirtqich ayolga tashlanib, uni voqea joyida halok qilgan. Ayiqni qoʻshnilardan biri otib oʻldirgan.
Voqeadan bir necha kun oldin Tergov qoʻmitasi sentyabr oyida ayiq hujumlari oqibatida olti kishi halok boʻlgani sababli mansabdorlarning xizmat vazifasiga beparvoligi yuzasidan jinoyat ishi qoʻzgʻatgan edi.
Tergovchilar Krasnoyarsk oʻlkasi Tabiiy resurslar va oʻrmon xoʻjaligi vazirligida tintuv oʻtkazdi. Hozircha ish boʻyicha gumonlanuvchilar nomi oshkor qilinmagan.
Tergovchilar taʼkidlashicha, hayvonlarning aholi yashaydigan joylar yaqinida koʻrinayotgani haqida koʻplab xabarlar kelib tushganiga qaramay, mansabdorlar yetarli choralar koʻrmagan.
Tergov qoʻmitasi maʼlumotiga koʻra, Krasnoyarsk oʻlkasida qoʻngʻir ayiqlar soni 2,5 barobar oshib, 26 mingdan oshgan. Ayiqlarning aholi punktlariga kirib kelgani haqida aholining 120 dan ortiq murojaati kelib tushgan. Hududiy Tabiiy resurslar vazirligi 1 214 ta ayiqni otishga ruxsat bergan.
Mutaxassislar ayiqlarning odamlar yashaydigan hududlarga tez-tez kelishini faqat ularning soni oshishi bilan izohlashmaydi. Bunga sabablar orasida ozuqa bazasi va yashash joylarining qisqarishi, oʻrmonlarning kesilishi va yongʻinlar, aholi punktlari yaqinidagi chiqindixonalar, oziq-ovqat chiqindilarini notoʻgʻri boshqarish hamda tabiatni muhofaza qilish dasturlariga yetarli mablagʻ ajratilmasligi bor.
Greenpeaceʼning Markaziy va Sharqiy Yevropa boʻyicha eksperti Dmitriy Markin aytishicha, ayiqlarni shunchaki otib tashlash muammoni hal qilmaydi.