Konstitutsiyaviy sud majlislari internetda translyatsiya qilinadi
Konstitutsiyaviy sudga majlislarni internetda translyatsiya qilish majburiyati yuklandi. Prezident Shavkat Mirziyoyev tomonidan 14-oktabr kuni imzolangan Konstitutsiyaviy sud toʻgʻrisidagi qonunning yangi tahririga koʻra, tegishli normalar 2028-yil 1-yanvardan kuchga kiradi.
Konstitutsiyaviy sud majlislari internet orqali namoyish etiladi
Konstitutsiyaviy sud (KS) fuqarolar va kompaniyalarga onlayn murojaat qilish, shuningdek, jarayonda videoaloqa va mobil ilova orqali qatnashish imkonini beradigan axborot tizimini amaliyotga joriy etadi. Bundan tashqari, instansiyaga majlislarni internetda translyatsiya qilish majburiyati yuklatildi. Prezident Shavkat Mirziyoyev 14-oktabr kuni imzolagan KS toʻgʻrisidagi qonunning yangi tahririga muvofiq, tegishli normalar 2028-yil 1-yanvardan kuchga kiradi.
Demak, sud ishlarini toʻliq onlayn rejimda yuritishga imkon beradigan elektron tizimni yaratish va ishga tushirish uchun bir yildan ortiq vaqt ajratilgan. Qonunda belgilangan boshqa qoidalar esa u eʼlon qilingan zahoti, yaʼni 14-oktabrdan boshlab amal qiladi.
Endilikda Konstitutsiyaviy sudda ish yuritish yozma shakl bilan birga elektron shaklda ham olib borilishi mumkin, bunday hujjatlar esa teng yuridik kuchga ega boʻladi.
Agar daʼvolar Konstitutsiyaviy sud vakolatiga kirmasa, KS murojaatlarni boshqa organlarga yuborish yoki ularni koʻrib chiqishni rad etish huquqiga ega. Jismoniy shaxslar va tashkilotlardan kelib tushgan arizalarni dastlabki oʻrganish uchun eng koʻpi bilan 15 kun ajratiladi.
Yangi tahrirdagi qonunda ishlarni koʻrib chiqishga tayyorlash tartibi — jarayon ishtirokchilarini aniqlashdan tortib, mutaxassis va ekspertlarni jalb etishgacha boʻlgan bosqichlar — mustahkamlab qoʻyilgan. Tayyorgarlik ishlari sud murojaatni olgan paytdan boshlab 20 kundan oshmasligi kerak. Shundan keyin instansiya 10 kun ichida muhokamani tayinlash haqida qaror qabul qilishi va barcha manfaatdor fuqarolarni eshituv boshlanishidan kamida 5 kun oldin xabardor etishi shart. Yigʻilishning sanasi, joyi va vaqti haqidagi maʼlumotlar KSning rasmiy veb-saytida eʼlon qilinishi lozim.
Qonunda KS qarorlarini taraflarga yuborishning oxirgi muddati ular qabul qilingan vaqtdan boshlab 5 kun etib belgilangan.
Agar ish Oliy sudning boshqa biron-bir jarayonda qoʻllanilayotgan normativ-huquqiy hujjatning Konstitutsiyaga muvofiqligi yuzasidan tushuntirish berishni talab qiluvchi murojaati asosida koʻrilayotgan boʻlsa, sud ish yuritishi KS qarori chiqqunga qadar vaqtincha toʻxtatib turiladi. Bunday holatda qaror chiqarish uchun bir oy muddat beriladi.
Bundan tashqari, KS har yili koʻrsatilgan davrda koʻrib chiqilgan ishlar amaliyotidan kelib chiqib, konstitutsiyaviy qonuniylik holati haqida hisobot tayyorlash majburiyatini oladi. Maʼruza respublika prezidentiga, shuningdek, mamlakat Oliy Majlisining ikkala palatasiga yuborilishi kerak.