Kolumbiyaning yangi prezidenti qurol nazorati qoidalarini yumshatdi
Prezident Abelardo de la Esprielya qonuniy oʻqotar qurol olib yurishga ruxsatnomalar berish boʻyicha oʻn yillik taqiqni bekor qildi.
Kolumbiyaning yangi prezidenti qurol nazorati qoidalarini yumshatdi
Abelardo de la Esprielya iyun oyida boʻlib oʻtgan prezidentlik saylovlarida jinoyatchilikka qarshi qattiqqoʻl boʻlish vaʼdasi bilan gʻalaba qozongan edi
Kolumbiya Prezidenti Abelardo de la Esprielya jamoat joylarida qonuniy oʻqotar qurol olib yurish cheklovlarini yumshatuvchi dekretni imzoladi.
Prezidentlik kampaniyasi davrida jinoyatchilikka qarshi temir musht bilan kurashishga vaʼda bergan De la Esprielya «jinoyatchilar tish-tirnogʻigacha qurollangan, oddiy odamlar esa oʻzlarini himoya qila olmaydigan vaziyat toʻgʻri emasligini» aytdi.
Ushbu dekret oʻn yil davomida amalda boʻlgan taqiqni bekor qiladi. Unga koʻra, hatto qurol olib yurish huquqini beruvchi ruxsatnomaga ega boʻlgan shaxslar ham qoʻshimcha ruxsatsiz qurol olib yura olmas edilar.
De la Esprielyaning taʼkidlashicha, dekret hamma uchun pala-partish qurollanishga yoʻl ochmaydi va qurolga egalik qilish huquqi kimga berilishi ustidan qatʼiy nazorat oʻz kuchida qoladi.
Dekretni imzolar ekan, prezident saylovoldi vaʼdasini bajarganini aytdi: «Erkak kishining soʻzi — uning sharafi, menda esa sharaf bor, shuning uchun vaʼdamning ustidan chiqaman».
Jamoat joylarida qonuniy qurol olib yurishni taqiqlash oʻsha paytdagi prezident Xuan Manuel Santos tomonidan 2015 yil dekabrida joriy etilgan edi. Bu dastlab Rojdestvo va Yangi yil bayramlari davrida xavfsizlikni yaxshilash uchun vaqtinchalik chora sifatida rejalashtirilgan edi.
Biroq, Santos va undan keyingi siyosiy spektrning qarama-qarshi qutblarida turgan ikki prezident — konservator Ivan Duke va soʻl qanot vakili Gustavo Petro ushbu taqiq muddatini har yili uzaytirib kelishdi.
Qonunga koʻra, hatto ruxsatnomasi bor shaxslar ham qoʻshimcha ruxsat soʻrab murojaat qilmaguncha va uni olmaguncha qurolni uylaridan tashqariga olib chiqa olmas edilar.
De la Esprielyaning aytishicha, uning dekreti hech qachon doimiy boʻlishi koʻzda tutilmagan cheklovni bekor qildi.
Ispaniyaning El País gazetasi xabar berishicha, ushbu dekret Kolumbiyada qurol olib yurish uchun qonuniy ruxsatnomaga ega boʻlgan deyarli 700 000 kishiga daxldor boʻladi.
Endilikda ularga, agar ruxsatnomalarining amal qilish muddati tugamagan boʻlsa, roʻyxatdan oʻtgan qurollarini uydan tashqariga olib chiqishga ruxsat beriladi.
«Yashil alyans» partiyasi senatori Ariel Avila bu qadamni «jiddiy xato» deb atadi va qonuniy saqlanayotgan qurollar jinoyatchilar qoʻliga tushib qolishini aytdi.
Avilaning taʼkidlashicha, bu axloqiy muammoni keltirib chiqaradi, chunki faqat davlat kuchlari qurol olib yurishi va odamlar xavfsizligining kafili boʻlishi kerak.
De la Esprielya bu chora mamlakatdagi xavfsizlikka zarar yetkazmasligini aytdi va huquq-tartibot idoralari noqonuniy qurol olib yurgan shaxslarni taʼqib qilayotganini hamda shu yilning oʻzida 15 000 dan ortiq oʻqotar qurol musodara qilinganini qoʻshimcha qildi.
De la Esprielyaning soʻzlariga koʻra, ularning aksariyati Farc isyonchilar guruhining ajralib chiqqan fraktsiyalari va «Koʻrfaz klani» jinoiy toʻdasi aʼzolariga tegishli boʻlgan.