Kim Chen Inning singlisi Shimoliy Koreya Binance’dan 6,3 mlrd dollar o‘g‘irlagani haqidagi ayblovlarni rad etdi
FQB Binance’ga uyushtirilgan kiberhujumda Shimoliy Koreya hakerlarini ayblamoqda. Kim Chen Inning singlisi esa bu ayblovlarni siyosiy provokatsiya deb atadi.
Kim Chen Inning singlisi Shimoliy Koreyaning Binance’dan 6,3 mlrd dollar o‘g‘irlagani haqidagi ayblovlarni inkor etdi
Shimoliy Koreya rahbari Kim Chen Inning singlisi, Koreya Mehnat partiyasi Markaziy qo‘mitasi bo‘lim mudiri Kim Yo Chjon KXDRning Binance kriptobirjasiga qilingan hakerlik hujumiga aloqadorligi haqidagi iddaolarni asossiz deb atadi. U buni AQSH tomonidan uyushtirilgan siyosiy provokatsiya sifatida baholadi.
“AQSH Federal qidiruv byurosi (FQB) hujumga Shimoliy Koreya tomonidan qo‘llab-quvvatlanadigan hakerlik guruhi aloqadorligi haqida ma’lumot olganini aytib, bizni kiberjinoyatchi davlat sifatida ko‘rsatishga urinmoqda. Ammo AQSHning bu da’volari asossiz va yangilik emas”, — deyiladi bayonotda.
Kim Yo Chjon bunday ayblovlar ilk bor ilgari surilmayotganini ta’kidladi. Uning eslatishicha, o‘tgan yili ham Vashington Bybit kriptobirjasiga qilingan hujum uchun Shimoliy Koreyani javobgar deb hisoblagan. Uning fikricha, AQSH kiberjinoyatchilik bahonasida boshqa davlatlarning ichki ishlariga aralashishga urinmoqda.
Kim Yo Chjon Binance bilan bog‘liq ayblovlarni nafaqat siyosiy provokatsiya, balki Shimoliy Koreyaning xalqaro obro‘siga zarar yetkazishga urinish deb ham atadi.
“Bu Shimoliy Koreyaning xalqaro obro‘siga putur yetkazish, mamlakatimiz sha’ni va davlat nufuzini tushirishga qaratilgan qabih urinishdir. Shuningdek, bu Shimoliy Koreya suverenitetining yana bir jiddiy buzilishi bo‘lib, endi kibermakonga ham yoyilmoqda”, — dedi u.
29-oktyabr kuni Binance kriptobirjasiga uyushtirilgan hakerlik hujumi natijasida 6,3 milliard dollarlik kriptovalyuta o‘g‘irlandi. Bu kriptobirjalar tarixidagi eng yirik o‘g‘irlik bo‘ldi. Hakerlar atigi 20 daqiqa ichida birjaning internetga ulangan kriptohamyonlaridan katta miqdordagi mablag‘larni yechib olgan.
Avvaliga Binance hakerlar kompaniya dasturchilaridan birining noutbuki orqali tizimga kirganini bildirgan. Keyinroq birja rahbari Richard Teng hujumchilar tizimga boshqa yo‘llar bilan ham kirganini tan oldi. Uning aytishicha, hakerlar hujum izlarini avtomatik tarzda o‘chirib tashlaydigan vositalardan foydalangan.
1-noyabrdan Binance mablag‘larni yechib olish imkoniyatini bosqichma-bosqich tiklashni boshladi. Dastlab bu funksiya bitkoin, Ethereum, USDT va USDC kabi 15 ta kriptovalyuta, shuningdek, AQSH dollari kabi 28 ta milliy valyuta uchun ochildi.
Birja foydalanuvchilarning yo‘qotishlarini o‘z mablag‘lari hisobidan qoplashga ham kirishdi. 31-oktyabr kuni zararning 90 foizi qoplangani, 1-noyabrda esa bu ko‘rsatkich 95 foizga yetgani ma’lum qilindi.
O‘g‘irlangan mablag‘larning qariyb 2,84 milliard dollari muzlatib qo‘yilgan, biroq hozircha birjaga qaytarilmagan. O‘g‘irlangan kriptovalyutaning yarmidan ko‘pi esa hanuz hakerlar nazoratida qolmoqda.
AQSH Federal qidiruv byurosi Binance’ga hujum ortida Shimoliy Koreyaning TraderTraitor hakerlik guruhi turganini ma’lum qilgan.
Bundan avval Chainalysis va TRM Labs tahlil kompaniyalari hamda kripto sohasidagi tergovchi ZachXBT ham shu taxminni ilgari surgan. Ularning ma’lumotlariga ko‘ra, TraderTraitor guruhi Bybit va Bitget kriptobirjalariga qilingan yirik hujumlarga ham aloqador.
AQSH prezidenti Donald Tramp esa Amerika hukumati Shimoliy Koreyaning hujumga aloqadorligi haqidagi taxminni hali o‘rganayotganini bildirgan.