Ketrin Zeta-Jons teleserialda uelscha talaffuzda gapirgani uchun muxlislari tomonidan olqishlandi
Gollivud aktrisasi oʻzining tabiiy Suonsi aktsentidan foydalangan holda yangi triller serialda bosh rolni ijro etmoqda.
Ketrin Zeta-Jons boʻlajak televizion triller serialida oʻzining tabiiy uelscha talaffuzida gapirgani uchun muxlislar tomonidan olqishlandi.
Bu Zeta-Jonsning uelscha talaffuzdan foydalangan birinchi yirik ekrandagi roli boʻladi.
56 yoshli Gollivud aktrisasi oʻzining tugʻilib oʻsgan shahri Suonsiga qaytdi, u yerda Amazon kompaniyasining «Kill Jackie» («Jekkini oʻldirish») seriali uchun suratga olish ishlarining bir qismi boʻlib oʻtdi.
Ijtimoiy tarmoqlarda boʻlishilgan treyler tomoshabinlarga serial haqida ilk tasavvurni beradi, shuningdek, unda Zeta-Jonsning Suonsi talaffuzida gapirgan lavhasi joy olgan.
Amazon Prime maʼlumotlariga koʻra, Oskar mukofoti sovrindori boʻlgan yulduz «xalqaro kokain dileri sifatidagi xavfli oʻtmishidan» qochib, anonim boʻlib qolishga harakat qilayotgan hashamatli hayot tarziga oʻrgangan Jekki Prays rolini oʻynaydi.
Muxlislardan biri «Uels qirolichasining uelscha gapirganini» eshitish juda yoqimli boʻlganini aytdi.
Serial Nik Xarkaueyning Eydan Truxen taxallusi ostida nashr etilgan «The Price You Pay» («Siz toʻlaydigan narx») romani asosida suratga olingan.
Suratga olish joylari sifatida Bilbao, Lissabon va London shaharlaridan ham foydalanilgan.
Zeta-Jons oʻzining bir qator avvalgi rollari, jumladan, Netflix’ning «Wednesday» («Uensdey») serialidagi Mortisha Addams roli va «Chicago» («Chikago») filmidagi Oskar mukofotiga sazovor boʻlgan ikkinchi darajali roli bilan mashhur.
«Kill Jackie» uning uelscha talaffuzidan foydalangan birinchi yirik roli boʻladi.
U ilgari Uels bilan chuqur bogʻliqligi haqida gapirib, qalban u yerni «hech qachon tark etmaganini» qoʻshimcha qilgan edi.
Muxlislardan biri Instagram’dagi treyler postiga: «Uning uelscha talaffuzi namoyon boʻldi va bu menga juda yoqdi, intizorlik bilan kutaman», deb izoh qoldirdi.
Zeta-Jons «kuch-qudrat, oʻzlikni anglash va gunohlarni yuvishni oʻz ichiga olgan» ayol yetakchiligidagi syujetni oʻrganish imkoniyatini intizorlik bilan kutganini aytdi.
Serialda «Killing Eve» («Yevani oʻldirish») yulduzi Deymon Tomas ham suratga tushgan, «Gangs Of London» («London bandalari») serialidan Tom Battervort esa stsenariy muallifi va shouranner hisoblanadi.
«Kill Jackie» premyerasi 2 oktyabr kuni Amazon Prime platformasida boʻlib oʻtadi.