Keskin oshirilgandan soʻng aeroportga kuzatib qoʻyish toʻlovlari qayta koʻrib chiqiladi
Tekshiruvni tasdiqlar ekan, hukumat "sayohatlar hamyonbop boʻlib qolishini va yoʻlovchilarga adolatli munosabatda boʻlinishini taʼminlash juda muhim" ekanini aytdi.
Hukumat soʻnggi yillardagi keskin oʻsishdan soʻng aeroportlarda yoʻlovchilarni tushirib qoldirish toʻlovlarini oʻrganib chiqadi.
Oʻtkazilgan tahlillardan biriga koʻra, yirik aeroportlardagi narxlar 2025 yil yozidan beri oʻrtacha uchdan bir qismga oshgan. Gatvik va Stansted aeroportlarida yoʻlovchilarni tushirib qoldirish toʻlovi 7 funt sterlingdan 10 funt sterlingga koʻtarilgach, ular eng qimmat aeroportlar deb topildi.
Edinburg aeroportida bu toʻlov 6 funtdan 8,50 funt sterlingga oshgan boʻlsa, Bornmutda toʻlov 5 funtdan 8 funtgacha koʻtarilib, Lids Bredford va London Siti narxlariga tenglashdi.
Transport vazirligi koʻrib chiqish majburiyatini olganini maʼlum qilib, "sayohatlar hamyonbop boʻlib qolishini va yoʻlovchilarga adolatli munosabatda boʻlinishini taʼminlash juda muhim" ekanini taʼkidladi.
Hukumat, shuningdek, aeroportlar "ayniqsa jamoat transporti muqobillari cheklangan joylarda narxlarni oshirishda vazminlik koʻrsatishiga" umid qilishini bildirdi.
Joriy yilning iyul oyida ushbu tahlilni oʻtkazgan RAC tashkiloti uzoq vaqtdan beri yoʻlovchilarni tushirib qoldirish toʻlovlarining oshirilishiga qarshi kampaniya olib bormoqda. Tashkilotning taʼkidlashicha, "kuzatib qoʻyish va uchib ketish" toʻlovlarining koʻrib chiqilishi "xaydovchilar uchun juda xushxabar" boʻladi.
"Biz aeroportlarda yoʻlovchilarni tushirib qoldirish toʻlovlari tobora ortib borayotgan gʻazab va norozilik manbai ekanini bilamiz", dedi RAC toʻng siyosiy ofitseri Rod Dennis.
"Biz soʻrov oʻtkazgan haydovchilarning beshdan toʻrt qismi buni 'shilish' deb hisoblaydi, faqat 10 kishidan biri aeroportlar nega bunday narx belgilashini tushunadi."
RAC tadqiqoti shuni koʻrsatdiki, toʻlovlarni faqat 2026 yilda joriy qilgan London Siti aeroporti daqiqabay hisoblanganda eng qimmati boʻlib chiqdi.
Uning besh daqiqa uchun belgilangan 8 funtlik toʻlovi daqiqasiga 1,60 funtga toʻgʻri keladi. Belfast xalqaro aeroporti endi yoʻlovchilarni tushirib qoldirish hududida 10 daqiqa uchun 5 funt undiradi, bu oʻtgan yilgidan 2 funtga koʻp.
RAC maʼlumotlariga koʻra, Yevropa Ittifoqidagi eng yaxshi 10 ta aeroportning hech biri yoʻlovchilarni tushirib qoldirish uchun toʻlov olmaydi.
Tashkilotning taʼkidlashicha, xalqaro aeroportlar yoʻlovchilarni tushirib qoldirish uchun toʻlov olmasligi kerak, garchi soha vakillari bu toʻlovlar aeroportlar biznes modellarining zarur qismi ekanini vaj qilishsa-da.
Toʻlovlar tarafdorlari, shuningdek, bu sayohatchilarni transportning atrof-muhit uchun xavfsizroq turlaridan foydalanishga undashini aytmoqda.
"Buyuk Britaniyadan tashqaridagi aeroportlar odatda davlat mulki hisoblanadi hamda davlat subsidiyalari va soliq imtiyozlarini oladi, Buyuk Britaniya aeroportlari esa odatda xususiy mulk boʻlib, tijorat soliq stavkalarining toʻliq toʻplamiga tortiladi", dedi aeroportlar manfaatini ifoda etuvchi Airports UK bosh jamoatchilik direktori Karen Di.
Uning qoʻshimcha qilishicha, aeroportlar "terminallarga sayohat qiluvchilar uchun turli xil imkoniyatlarni, jumladan, bepul tushirib qoldirish shoxobchalarini" taklif etadi va hukumatning "har qanday tekshiruvi" aeroportlarning "tirbandlik va havo ifloslanishini boshqarishning turli usullaridan aʼlo darajada foydalanishini" koʻrsatadi.
Aviation Environment Federation kampaniya guruhi ilgari bu toʻlovlarni himoya qilib, ular aeroportlar atrofidagi tirbandlik va havo ifloslanishini kamaytirishga yordam berishini aytgan edi.
Shu oy boshida hukumat keyingi yilgi yozgi taʼtilgacha samolyotda farzandlari bilan birga oʻtiradigan ota-onalar uchun qoʻshimcha toʻlovlar bekor qilinishini eʼlon qildi.
Bosh vazir Yendi Bernxem bu oʻzgarishlar xonadonlar uchun turmush darajasi bosimini yengillashtirishga qaratilgan "kundalik yechimlar" turkumining bir qismi ekanini aytdi.