Keniya farmatsevtlari allergiyaga qarshi dori vositasini qinni tortishtirish uchun ishlatish bilan bogʻliq ommalashgan urfdan ogohlantirmoqda
Tabletkalarni kiritishga urinib koʻrgan ayollarga jarayonni toʻxtatish va zarurat tugʻilganda tibbiy yordamga murojaat qilish tavsiya etiladi.
Keniya farmatsevtlari qinni toraytirish uchun allergiya dorisidan foydalanish boʻyicha virusdek tarqalgan trenddan ogohlantirmoqda
Tsetirizin allergiya simptomlarini yengillashtirish uchun keng qoʻllaniladi
Keniyadagi farmatsevtlar ijtimoiy tarmoqlarda ehtimoliy zararli tibbiy maslahatlar tarqalganidan soʻng, ayollarga qinni torroq qilish maqsadida uning ichiga allergiya tabletkalarini joylashtirmaslikni uqtirib, ogohlantirish berdi.
Ushbu ogohlantirish ijtimoiy tarmoqlarda allergiyani davolash uchun ichiladigan odatdagi antigistamin vositasi boʻlmish tsetirizinni goʻyoki jinsiy rohatni oshirish maqsadida qinni toraytirish usuli sifatida targʻib qiluvchi postlar keskin koʻpayganidan soʻng berildi.
Antigistamin preparatlari baʼzida nojoʻya taʼsir sifatida quruqlikka olib kelishi mumkin boʻlsa-da, mutaxassislarning taʼkidlashicha, bu qin mushaklarini mustahkamlamaydi.
«Quruqlik — bu torlik emas... aksincha, u ishqalanishni, noqulaylikni va toʻqimalarning shikastlanish xavfini oshirishi mumkin», — dedi Keniya Farmatsevtika Jamiyati (PSK).
«Ogʻiz orqali qabul qilinadigan tabletkalarni ichkariga kiritish xavfli. Tsetirizin tabletkalari yutish uchun moʻljallangan. Ularning tarkibiy qismlari qinning nozik toʻqimalarida sinovdan oʻtkazilmagan», — deya qoʻshimcha qildi jamiyat.
Tsetirizin odatda aksirish, burun oqishi, koʻz va terining qichishishi hamda eshakemi kabi allergik reaktsiyalar simptomlarini yengillashtirish uchun qabul qilinadi.
Bu muammo shu hafta boshida X (sobiq Twitter) tarmogʻida tsetirizin qin namligini kamaytirishi va jinsiy aloqa paytida torlik hissini yaratishi mumkinligi haqidagi postlar paydo boʻlganidan soʻng boshlandi.
Bu keng muhokamalarga sabab boʻldi: baʼzi foydalanuvchilar ushbu amaliyotni qoʻllab-quvvatlagan boʻlsa, boshqalari uning xavfsizligidan xavotir bildirdi.
Mahalliy ommaviy axborot vositalari shuningdek, ayrim dorixonalarda, ayniqsa poytaxt Nayrobida ushbu dorining narxi oshgani va unga boʻlgan talab ortgani haqida xabar berdi.
«Tsetirizin — bu ogʻiz orqali qabul qilinadigan allergiya dorisidir. U boshqa biror-bir maqsad uchun, ayniqsa qin ichida qoʻllash uchun tasdiqlanmagan va sinovdan oʻtkazilmagan», — deyiladi Keniyadagi farmatsevtlar manfaatini ifoda etuvchi kasbiy tashkilot — PSK tomonidan payshanba kuni eʼlon qilingan bayonotda.
«Agar siz uni allaqachon sinab koʻrgan boʻlsangiz, toʻxtating. Agar sizda ogʻriq, qonash, achishish, qichishish, odatdagidan tashqari ajratmalar yoki isitma kuzatilsa, shifokorga murojaat qiling», — deyiladi maslahatda.
Jamiyat, shuningdek, ijtimoiy tarmoq inflyuyenserlari va kontent yaratuvchilarini sogʻliqni saqlashga oid maʼlumotlarni joylashtirishda ehtiyotkor boʻlishga chaqirib, tasdiqlanmagan daʼvolar odamlar sogʻligʻini xavf ostiga qoʻyishi mumkinligini taʼkidladi.
Ushbu ogohlantirish Keniya Sogʻliqni saqlash vazirligi ushbu trenddan xavotir bildirganining ertasi kuni paydo boʻldi.
Yuqori lavozimli sogʻliqni saqlash mulozimi Uma Oluganing aytishicha, ijtimoiy tarmoqlarning ayrim foydalanuvchilari mutaxassislarning tibbiy maslahatlariga mumkin boʻlgan oqibatlar haqida oʻylamay, hazil sifatida qaramoqda.
Uning taʼkidlashicha, rasmiylar notoʻgʻri foydalanish holatlarini aniqlashga yordam berish uchun dori-darmonlarni tarqatish va sotib olishni nazorat qilish tizimini joriy etishni koʻrib chiqishlari mumkin.
Biroq, bunday tashabbus boʻyicha hali hech qanday rasmiy qaror eʼlon qilingani yoʻq.
PSK baʼzi dorixonalarda tsetirizinga boʻlgan talabning ortgani, narxlarning koʻtarilgani va tanqislik yuzaga kelgani haqidagi xabarlarni koʻrganini bildirdi.
U chakana sotuvchilarni ushbu trenddan foydalanib qolmaslikka chaqirib, allergiya sababli ushbu doriga haqiqatan ham muhtoj boʻlgan odamlar uni olishda qiyinchilikka duch kelishlari mumkinligidan ogohlantirdi.
Shuningdek, tashkilot oʻz aʼzolarini notoʻgʻri maqsadlarda foydalaniladigan dori-darmonlarni bilgan holda bermaslikka va ulardan foydalanganlarda kuzatilgan har qanday nojoʻya taʼsirlar haqida sogʻliqni saqlash organlariga xabar berishga chaqirdi.
PSK oʻz bayonotini tarmoqdagi tasdiqlanmagan trendlar hech qachon mutaxassis maslahatidan ustun boʻlmasligi kerakligini taʼkidlab yakunladi: «Har qanday dori vositasini oʻzi moʻljallanmagan maqsadda qoʻllashdan oldin farmatsevt bilan maslahatlashing.
«Tibbiy maslahat olishda ijtimoiy tarmoqlarga tayanmang».