“Kelajakda nima bo‘lishini bilmayman, keyingi o‘yinga tayyorgarlik ko‘ramiz” — Maykl Kerrik
Avvalroq “Manchester Yunayted” bosh murabbiyi iste’foga chiqarilishi mumkinligi xabar qilingandi.
“Kelajakda nima bo‘lishini bilmayman, keyingi o‘yinga tayyorgarlik ko‘ramiz” — Maykl Kerrik
“Manchester Yunayted” bosh murabbiyi Maykl Kerrik UEFA Chempionlar Ligasining to‘rtinchi turida “Roma” ustidan qo‘lga kiritilgan irodali g‘alabadan so‘ng o‘z fikrlarini bildirdi. Rimliklar uchrashuv boshida 2:0 hisobida oldinda borishayotgandi, biroq yakunda “MYU” vaziyatni o‘z foydasiga o‘zgartirishga muvaffaq bo‘ldi.
“Bu qiyin o‘yin bo‘ldi. Biz yaxshi boshlagandik, qiyin bo‘lishini bilardik: ‘Roma’ butun mavsum davomida faqat bir marta mag'lub bo‘ldi. Ular juda, juda yaxshi jamoa. Gol kutilmaganda urildi. Biz o‘zimiz uchun bir nechta muammolar yaratdik. Ba’zi vaziyatlarda asabiy harakat qildik.
Birinchi bo‘lim oxiriga yaqin o‘yinimiz biroz kuchaydi, tanaffusda yigitlarga ijobiy natijaga erishishimiz kerakligini aytdim. Bu holatda har kichik turtki ham o‘yinni o‘zgartirib yuborishi mumkin edi; men buni yillar davomida ko‘p marta ko‘rganman. Shunchaki o‘zingizga ishonishingiz kerak. Yigitlar ikkinchi bo‘limda ajoyib o‘ynashdi.
Ular taslim bo‘lishmadi, ortga chekinishmadi va oxir-oqibat ular munosib bo‘lgan natijaga erishishdi. Gol urish uchun imkoniyatlar bo‘ldi, biz o‘z imkoniyatimizni izlashda davom etdik, bosim o‘tkazishda davom etdik va oxir-oqibat yechim topdik.
Kelajakda nima bo‘lishini aytib berish uchun billur sharim yo‘q. Biz dam olish kunlaridagi o‘yinga tayyorgarlik ko‘ramiz — ‘Aston Villa’ ga qarshi juda muhim o‘yin yaqinlashib kelmoqda”, dedi Kerrik.
Ushbu o‘yindan so‘ng, “Manchester Yunayted” Chempionlar Ligasi jadvalida olti ochko bilan 17-o‘rinda, “Roma” esa to‘rt ochko bilan 19-o‘rinda bormoqda.