Fernandesh magʻlubiyatdan keyin bosh murabbiyga qarshi chiqdi
«MU» sardori Kerrikning «Komo»ga qarshi qoʻllagan taktikasini tanqid qildi, murabbiy esa futbolchilarning oʻzini aybladi.
Fernandesh magʻlubiyatdan soʻng bosh murabbiyga qarshi chiqdi
«Manchester Yunayted» YECHL guruh bosqichining 3-turida «Komo» maydonida yirik hisobda magʻlub boʻldi — 1:4. Uchrashuvdan keyin esa klub ichida mojaro yuzaga keldi: jamoa sardori Brunu Fernandesh bosh murabbiy Maykl Kerrikning taktik rejasini ochiq tanqid qilib, toʻpsiz oʻynashda boshqacha yondashuvni taklif qildi.
«Yunayted» safardagi bahsda ilk daqiqalardanoq qiyinchilikka duch keldi: «Komo» yarimhimoyachisi Niko Pas ikkinchi daqiqadayoq hisobni ochdi. Tanaffusdan keyin italiyaliklar ustunlikni yanada oshirishdi — Anastasios Duvikas, Pas va Xakobo Ramon navbati bilan gol urishdi. Mehmonlar esa 91-daqiqada Joshua Zirkzening yagona goli bilan javob qaytarishdi.
Oʻyin tugagach, inglizlar jamoasi lagerida vaziyat keskinlashdi. «MU» sardori bosh murabbiy tanlagan taktika ushbu uchrashuv uchun toʻgʻri boʻlganiga ochiqchasiga shubha bildirdi. 67-daqiqada zaxiraga olingan portugaliyalik yarimhimoyachi personal pressingdan voz kechilib, raqibga toʻp bilan erkin harakat qilish imkoniyati berilganidan norozi boʻlgan.
«Bu biz oʻyinni yomon boshlab, tezkor gol oʻtkazib yuborgan ilk uchrashuvimiz emas. Raqib toʻpga egalik qilayotganida deyarli bosim oʻtkazmayapmiz, toʻp bizda boʻlganda ham sifatli oʻynamayapmiz, deyarli hech narsa ishlamayapti. Tezkor gol oʻtkazib yuborsang, goʻyo allaqachon yutqazib qoʻygandek boʻlasan. Bunday holatdan chiqib ketish qiyin, dadil harakat qilish, toʻpni nazorat qilish va vaziyatlar yaratish ham murakkablashadi. Agar biz buni uddalay olmasak, vaziyatni oʻzgartirish juda qiyin boʻladi», – dedi Brunu.
Shundan soʻng u murabbiylar shtabi qarorlari haqida ham fikr bildirdi.
«Personal pressing qilmaslik, raqibga boʻshliq qoldirish va toʻpni olib qoʻyish uchun imkon kutish — bu murabbiylarning qarori edi. Ammo bunday jamoalarga haddan tashqari erkinlik berilsa, ular oʻziga katta ishonch hosil qila boshlaydi. Bunga men emas, bosh murabbiy va uning shtabi baho berishi kerak. Baʼzida dadilroq harakat qilish, tavakkal qilish, oldinroqda bosim oʻtkazish va raqibga noqulaylik tugʻdirish kerak. Ularning markaziy himoyachisi meni maydonning ikkinchi yarmidayoq qarshi oldi. Biz ham shunday qilishimiz kerak edi, lekin uddalay olmadik», – deya uning soʻzlarini TNT Sports keltiradi.
Jurnalist Kerrik tanlagan taktika toʻgʻridan toʻgʻri xato boʻlganmi, deb soʻraganida futbolchi javobdan qochdi, biroq tanqidini davom ettirdi: «Bu savol menga emas, murabbiy va uning shtabiga. Baʼzida dadilroq boʻlish kerak, sizni pressing qilishganida tavakkal qilish va bosim oʻtkazib, ularni oʻzini noqulay his qilishga majburlash kerak».