Kasb-hunar taʼlimida yangi tartib: oʻqish, qabul va baholash tizimi oʻzgaradi
Oʻzbekistonda kasbiy taʼlim tizimini tartibga soluvchi yangi nizomlar tasdiqlandi. Unga koʻra, kasb-hunar taʼlimi mehnat bozori ehtiyojlariga moslashtiriladi, oʻquvchilarni qabul qilish, pedagoglarni ishga olish va bilimni baholash tartibi yangilanadi.
Kasb-hunar taʼlimida yangi tartib joriy etildi: oʻqish, qabul va baholash tizimi yangilanadi
Vazirlar Mahkamasining 2026-yil 29-sentabrdagi 526-son qarori bilan kasbiy taʼlim sohasiga doir bir qator normativ-huquqiy hujjatlar tasdiqlandi.
Qarorga muvofiq, kasbiy taʼlim toʻgʻrisidagi nizom; kasbiy taʼlim tashkilotlariga oʻqishga qabul qilish tartibi; kasbiy taʼlim tashkilotlariga pedagog kadrlarni tanlov asosida ishga qabul qilish tartibi; kasbiy taʼlim tashkilotlari oʻquvchilarining bilimini baholash tartibi tasdiqlandi.
Yangi nizomlar Oʻzbekistonda kasbiy taʼlimni tashkil etish va amalga oshirish tartibini belgilab beradi. Ularning talablari barcha kasbiy taʼlim tashkilotlariga tatbiq etiladi.
Hujjatga koʻra, kasbiy taʼlim iqtisodiyotning rivojlanish istiqbollari, ustuvor vazifalari, zamonaviy texnik va texnologik tendensiyalar, shuningdek, mehnat bozorida oʻrta boʻgʻin kadrlarga boʻlgan ehtiyoj inobatga olingan holda tashkil etiladi.
Taʼlim jarayoni ish beruvchilarning takliflari hamda «hayot davomida taʼlim olish» tamoyili asosida yoʻlga qoʻyiladi. Bu fuqarolarga muayyan kasb yoki mutaxassislik boʻyicha bilim va koʻnikmalarni egallash imkonini beradi.
Nizomda «akademik qarzdor», «bilim», «boshlangʻich kasbiy taʼlim dasturlari», «buyurtmachi texnikum», «inklyuziv taʼlim dasturi», «kvalifikatsiya», «kompetensiya», «koʻnikma» va boshqa tushunchalarga aniq taʼriflar berilgan.
Kasbiy taʼlim tashkilotlari oʻquvchilarga boshlangʻich kasbiy taʼlim, oʻrta kasbiy taʼlim va oʻrta maxsus kasbiy taʼlim dasturlari boʻyicha bilim beradi. Texnikumlar esa oʻrta boʻgʻin kadrlarini tayyorlash, oʻquvchilarning amaliy koʻnikmalarini rivojlantirish va ishlab chiqarish taʼlimi ustalarining malakasini oshirish uchun tashkil etiladi.
Shuningdek, inklyuziv taʼlim dasturlari nogironligi boʻlgan shaxslarning alohida ehtiyojlarini hisobga olgan holda ishlab chiqiladi. Bunday dasturlarda moslashtirilgan taʼlim dasturlari, maxsus pedagogik yondashuvlar va qoʻshimcha qoʻllab-quvvatlash choralari nazarda tutiladi.
Qaror bilan ilgari qabul qilingan ayrim hukumat qarorlariga oʻzgartirish va qoʻshimchalar kiritildi. Ayrim qarorlar esa oʻz kuchini yoʻqotgan deb hisoblandi.