Menejerlik sertifikatini olgan kasbiy ta’lim tashkilotlari direktorlari ustamalar bilan rag‘batlantiriladi

O‘zbekistonda kasbiy ta’lim muassasalari direktorlari endilikda menejerlik sertifikatiga ega bo‘lgan taqdirda ustamalar bilan taqdirlanadi. Bu haqda Vazirlar Mahkamasining 20-avgustdagi “Kasbiy ta’lim tizimi boshqaruv va pedagog kadrlarini kasbiy rivojlantirish tizimini yanada takomillashtirish chora-tadbirlari to‘g‘risida”gi 451-sonli qarorida belgilangan.

Prezidentning 2025-yil 23-oktabrdagi PQ-316-sonli qaroriga ko‘ra, umumta’lim fanlari o‘qituvchilarining malakasi Abdulla Avloniy nomidagi Pedagogik mahorat milliy instituti va hududiy pedagogik mahorat markazlarida oshiriladi.

Maxsus fan o‘qituvchilarining malakasi yetakchi oliy ta’lim muassasalarida, ishlab chiqarish ta’limi ustalarining malakasi esa hududiy ilg‘or kasbiy mahorat texnikumlarida hamda tegishli soha bo‘yicha malaka oshirish faoliyati bilan shug‘ullanish huquqiga ega tashkilotlarda oshiriladi.

Shuningdek, 2026/2027 o‘quv yilidan boshlab menejerlik sertifikati asosida kasbiy ta’lim muassasalari direktoriga lavozim maoshining 50 foizi va uning o‘rinbosarlariga 30 foizi miqdorida har oylik ustama berish tizimi joriy etiladi.

Hujjat bilan Kasbiy ta’lim tashkilotlari direktorlari va direktor o‘rinbosarlarini menejerlik o‘quv kurslarida o‘qitish va ularga menejerlik sertifikatini berish tartibi to‘g‘risidagi nizom tasdiqlandi. Ushbu nizom tegishli tartiblarni belgilaydi.

Mazkur hujjat Qonun hujjatlari ma’lumotlari milliy bazasida davlat tilida e’lon qilingan va 21-avgustdan kuchga kirgan.