Karlsen va Sindarov GCL turnirida ikki bor toʻqnash kelishadi
Dunyoning birinchi raqamli shaxmatchisi Magnus Karlsen va oʻzbekistonlik grossmeyster Javohir Sindarov Bengaluruda boʻlib oʻtadigan Global Chess League turnirida oʻzaro toʻqnash kelishadi.
Karlsen va Sindarov GCL doirasida ikki bor toʻqnash kelishadi
Dunyoning 1-raqamli shaxmatchisi Magnus Karlsen va oʻzbekistonlik grossmeyster Javohir Sindarov 2026 yilning 5 sentyabridan 13 sentyabriga qadar Hindistonning Bangalor shahrida boʻlib oʻtadigan, oltita franshiza oʻzaro kuch sinashadigan Tech Mahindra Global Chess League turnirida kamida ikki marta toʻqnash kelishlari kutilmoqda.
Karlsen amaldagi chempion — «Alpine PBL Pipers» jamoasining birinchi taxtasida (icon board) dona sursa, Sindarov «Fyers American Gambits» jamoasida xuddi shu rolni bajaradi. Ikki shaxmatchi dastlabki ikki davrali aylanma tizim bosqichida ikki marta — bir bor oq va bir bor qora donalarda oʻzaro bahslashadi. Agar har ikki jamoa yarim finalga, uchinchi oʻrin uchun bahsga yoki finalga yoʻl olsa, Karlsen va Sindarov yana ikki martagacha toʻqnash kelishlari mumkin.
Bu yil Global Chess League turniri 2024 yilgi London mezbonligidan soʻng yana Hindistonga qaytmoqda va Bangalor mezbon shaharga aylanadi. Musobaqa Samarqandda 400 ta jamoa ishtirokida boshlanadigan Shaxmat olimpiadasidan ikki kun oldin yakunlanadi.
Karlsen va Sindarovdan tashqari, qolgan toʻrtta franshizaning yetakchi taxtalarida quyidagi shaxmatchilar dona suradi: «Triveni Continental Kings» safida Alirizo Firuzja, «Ganges Grandmasters»da Yan Nepomnyashchiy, sobiq jahon chempioni Vishvanatan Anand «PBG Alaskan Knights»da va Maksim Vashye-Lagrav «CheQ Mumba Masters» jamoasida. Erkaklar oʻrtasidagi bahslarda boshqa taniqli oʻyinchilar qatorida 15 yoshli turkiyalik Yagiz Kaan Erdogmush ham bor, ayollar bahsini esa Daʼvogarlar turniri vitse-chempioni Bibisara Asaubayeva boshqarib boradi.
Oʻyinlar butun partiya uchun 20 daqiqalik vaqt nazorati bilan oʻynaladi, bunda 41-yurishdan boshlab har bir yurish uchun ikki soniyadan vaqt qoʻshib boriladi. Karlsen va Sindarov bundan oldin ham bir necha bor, asosan piyoda boʻlmagan figuralarning boshlangʻich joylashuvi tasodifiy tarzda belgilanadigan Freestyle Chess (erkin uslubdagi shaxmat) yoʻnalishida oʻzaro toʻqnash kelishgan. Boʻlajak uchrashuvlar jamoaviy natijalarga bevosita taʼsir qiladi, chunki shaxsiy natijalar franshizalarning turnir jadvalidagi oʻrniga taʼsir koʻrsatadi. Kriket boʻyicha Hindiston Premyer-ligasidan ilhomlangan Global Chess League global auditoriyani kengaytirish uchun eng kuchli erkak, ayol va yosh shaxmatchilarni birlashtirishni maqsad qilgan. Tashkilotchilar, shuningdek, Bangalorda yangi texnik vositalarni, jumladan, oʻyin natijalarini prognoz qiluvchi ehtimollik ilovalarini sinovdan oʻtkazishmoqda.