Karl Bushbi La-Mansh boʻgʻozini suzib oʻtishni yakunladi

Karl Bushbi La-Mansh boʻgʻozini suzib oʻtishni yakunladi

Karl Bushbi Buyuk Britaniyaga yetib kelganidan keyin oʻz sayohatining yakuniga yana bir qadam yaqinlashdi.

Sarguzashttalab Karl Bushbi 28 yillik sayohatdan soʻng Buyuk Britaniya tuprogʻiga qadam qoʻyib, La-Mansh boʻgʻozi orqali bir necha kunlik suzishni yakunlaganini aytdi.

57 yoshli Bushbi 1998 yil 1 noyabrda Janubiy Amerikadagi Chilidan yoʻlga chiqqan boʻlib, oʻzi uchun ikkita qoida belgilab olgan edi: u oldinga harakat qilish uchun transportdan foydalanmaydi va sayohat tugamaguncha uyiga qaytmaydi.

Seshanba kuni u Frantsiyadan Buyuk Britaniyaga suzib oʻtganini maʼlum qildi, bu uning Halldagi bolalik uyiga qaytish yoʻlidagi soʻnggi yirik toʻsiq edi.

Bushbi shunday dedi: "Shuncha yillardan keyin oyogʻim ostida Buyuk Britaniya tuprogʻini his qilish juda yoqimli. Bu oson boʻlmadi va buning asl mohiyati ham shunda — oʻzim oʻylaganimdan koʻra koʻproq narsaga qodir ekanimni isbotlash".

U qoʻshimcha qildi: "Har birimiz tasavvur qilganimizdan ham koʻproq narsaga erisha olamiz".

Bushbining soʻzlariga koʻra, suzish uch kun davomida jami 20 soat davom etgan va u dushanba kuni BST (Britaniya yozgi vaqti) bilan soat 15:30 da Doverdan sal janubda joylashgan Shekspir sohiliga yetib kelgan.

Bushbi jamoasining maʼlum qilishicha, uni sohilda kichik bir guruh doʻstlari va oila aʼzolari, jumladan, otasi — sobiq SAS askari Kit Bushbi hamda ushbu sayohat haqida "Walk of Life" ("Hayot yoʻli") nomli toʻliq metrajli hujjatli film suratga olayotgan taniqli rejissyor Verner Xertsog kutib olgan.

Koʻp yillar davomida frantsuzlar La-Mansh boʻgʻozi orqali suzishni faqat Buyuk Britaniyadan boshlashga ruxsat berishgan, Frantsiyadan emas.

Biroq Bushbi jamoasi ham Frantsiya, ham Buyuk Britaniya rasmiylaridan ruxsat olinganini va "xavfsizlik nuqtai nazaridan" bu voqea aynan qachon sodir boʻlishini oshkor qilmaslikni maʼqul koʻrishganini bildirdi.

Hozirgacha Bushbi 29 ta davlatdan oʻtib, 30 000 mildan (48 000 km) ortiq masofani bosib oʻtdi.

U Janubiy Amerikani piyoda bosib oʻtdi, xavfli Daryen tirqishini kesib oʻtdi va shimolga, Alyaskaga qarab yoʻlini davom ettirdi.

U yerdan Bering boʻgʻozini piyoda, zarur joylarda esa suzib oʻtdi.

Keyin Bushbi Sibir va Osiyoning qolgan qismi orqali yoʻl oldi, soʻngra Kaspiy dengizini suzib oʻtdi, bu oʻtish 31 kun davom etdi.

U oʻtgan yili Yevropaga kirib keldi va oʻtgan oyda La-Mansh boʻgʻoziga yetib bordi.

Sayohat davomida koʻplab muvaffaqiyatsizliklar kuzatildi: viza cheklovlari, unga homiylik qilganlarni yoʻqotishiga olib kelgan 2008 yilgi moliyaviy inqiroz, Covid-19 va geosiyosat uning harakatini toʻxtatib qoʻydi.

Iyun oyida La-Mansh tunneli rahbarlari uning xizmat tunnelidan foydalanish haqidagi iltimosini rad etishdi, bu esa uning aytishicha, suzishdan boshqa chora qoldirmadi.

Sentyabr oyida, BBC Belgiyada Bushbi bilan uchrashganda, u "buni yakunlash vaqti kelganini" aytib, shunday qoʻshimcha qilgan edi: "Men buni yana uzoq davom ettirishni xohlamayman".

Uning aytishicha, uni hamisha tabiat va ufqlar oʻziga tortgan, bu esa unda sarguzashtlarga boʻlgan ishtiyoqni uygʻotgan.

U noyabr oyi boshida Hallga yetib borishi kutilmoqda.