OAV: Shahzoda Harri oilasi bilan Buyuk Britaniyaga qaytmoqchi
Buyuk Britaniya qiroli Karl IIIning kichik o‘g‘li shahzoda Harri rafiqasi Megan Markl va farzandlari bilan AQShdan Buyuk Britaniyaga qaytishni rejalashtirmoqda. Britaniya OAVga ko‘ra, oila London tashqarisidagi xususiy uyda yashashi, Archi va Lilibet esa sentyabrdan Britaniyadagi maktabga qatnay boshlashi mumkin.
OAV xabarlariga ko‘ra, shahzoda Harri oilasi bilan Buyuk Britaniyaga qaytishni rejalashtirmoqda.
The Daily Telegraph va The Sun nashrlarining 19-avgustdagi ma’lumotlariga ko‘ra, shahzoda Harri va Megan Markl Kaliforniyaga ko‘chib ketganlaridan olti yil o‘tib, Buyuk Britaniyaga qaytishga tayyorgarlik ko‘rmoqda. Bu xabarni BBC va Press Association ham tarqatgan. Biroq, hozircha Harri va Megan, shuningdek, Britaniya qirollik oilasi bu rejalarni rasman tasdiqlamagan. Shu sababli, ularning AQShdan butunlay ko‘chib kelishi yoki Buyuk Britaniyada faqat bir necha oy yoxud yil yashashi noma’lumligicha qolmoqda.
OAV ma’lumotlariga ko‘ra, qirollik oilasi ham Harrining qaytish rejasi haqida yaqindagina xabardor qilingan. Qirol Karl III bu haqda 16-avgust kuni bilgan. Manbalarning ta’kidlashicha, monarx kichik o‘g‘lining oilasi qaytishidan va nabiralari – 7 yoshli Archi hamda 5 yoshli Lilibet bilan tez-tez ko‘rishish imkoniyati paydo bo‘lishidan mamnun.
Shahzoda Harri va amerikalik aktrisa Megan Markl 2018-yil bahorida turmush qurgan. 2020-yil boshida esa ular qirollik oilasining yuqori martabali a’zolari sifatidagi vazifalaridan voz kechib, keyinchalik AQShga ko‘chib ketgan edi. Bu jarayon Britaniya matbuotida “Megzit” nomi bilan mashhur bo‘lgan.
Kaliforniyaga ko‘chib o‘tganidan keyin Harri va Megan qirollik oilasi haqida bir qator keskin bayonotlar bergan. Xususan, Megan Harrining qarindoshlarini irqchilikda ayblagan. OAVda 2022-yilda vafot etgan qirolicha Yelizaveta II ham nabirasi va uning rafiqasining qirollik vazifalaridan voz kechishini og‘ir qabul qilgani haqida xabarlar tarqalgan edi.
So‘nggi vaqtlarda esa Harri va qirollik oilasi o‘rtasidagi munosabatlar yumshay boshlagani aytilmoqda. 2025-yilda shahzoda oilasi bilan yarashish istagini bildirgan. O‘sha yil sentyabrda Buyuk Britaniyaga tashrifi chog‘ida u Londonda otasi Karl III bilan uchrashgan.
2026-yil iyulida esa qirol Karl III ko‘p yillik tanaffusdan so‘ng kichik o‘g‘lining oilasi bilan Angliyaning Glostershir grafligidagi Xaygrouv qarorgohida uchrashgan. Archi va Lilibet bobosi bilan bunga qadar oxirgi marta 2022-yilda ko‘rishgan edi. Matbuot ma’lumotlariga ko‘ra, Xaygrouvdagi uchrashuvda qirolicha Kamilla ham ishtirok etgan.
Shu tariqa, agar Britaniya OAVda tarqalgan ma’lumotlar tasdiqlansa, Harri va Meganning qaytishi 2020-yilgi “Megzit”dan keyin qirollik oilasi bilan munosabatlardagi eng muhim o‘zgarishlardan biri bo‘lishi mumkin. Hozircha Bukingem saroyi ham, Harri va Megan vakillari ham bu xabarlarga rasmiy munosabat bildirmagan.