Kanalettoning nomaʼlum asari auktsionda 60 ming funt sterlingga sotilishi mumkin
Noyob sanʼat asari shu oy oxirida Abingdondagi Mallams auktsion uyida kim oshdi savdosiga qoʻyiladi.
**Kanalettoning nomaʼlum asari auktsionda 60 ming funt sterlingga sotilishi mumkin**
Kamyob sanʼat asari 40 000 dan 60 000 funt sterlinggacha boʻlgan narxda sotilishi kutilmoqda.
Mashhur italyan rassomi Kanalettoning ilgari nomaʼlum boʻlgan asari kim oshdi savdosiga qoʻyilishi kutilmoqda.
Kaprichchio deb taʼriflangan ushbu kamyob asar shu oy oxirida Oksfordshir grafligining Abingdon shahridagi Mallams auktsion uyida sotilganda 40 000 dan 60 000 funt sterlinggacha baholanishi taxmin qilinmoqda.
Haqiqiy ismi Jovanni Antonio Kanal boʻlgan Kanaletto 1697 yilda Venetsiyada tugʻilgan va keyinchalik britaniyalik sanʼat kollektsionerlarining sevimli rassomiga aylangan.
Mallams vakillarining taʼkidlashicha, auktsionga qoʻyilayotgan asar XVIII asr venetsiyalik ustasi tomonidan qogʻozda pero, jigarrang siyoh va och kulrang boʻyoq (tush) yordamida yaratilgan.
Sanʼatshunos Jon Rolf Kanalettoning ushbu asarini — *«Suv ustidagi pavilon va arkada xarobalari»*ni — «shohasar» deb atadi.
Uning soʻzlariga koʻra, unda «oʻtmishdagi meʼmoriy ulugʻvorlikning xarobalari» tasvirlangan boʻlib, u yerda «soya va quyosh nurlari orasida kundalik hayot davom etmoqda».
«Ushbu rasm oʻsha davr kollektsionerlarini oʻziga jalb qilgan va kelajak avlod rassomlarini ilhomlantirgan fazilatlarning toʻliq spektrini namoyish etadi».
Rasm Kanalettoning oxirgi marta 1995 yilda Christie's auktsionida sotilgan suratiga mos keladi.
Kanaletto Venetsiya tasviriy sanʼat maktabi vakili boʻlib, butun Yevropa boʻylab Venetsiya va London shaharlari manzaralari bilan mashhur boʻlgan.
Biroq, Mallams vakillarining soʻzlariga koʻra, uning vatanida kaprichchiolari — koʻpincha klassik xarobalarni oʻz ichiga olgan xayoliy manzaralari — yuqoriroq baholangan.
Taʼkidlanishicha, ilgari qayd etilmagan va 21 oktyabrda kim oshdi savdosiga qoʻyiladigan ushbu asar Kanalettoning oxirgi marta 1995 yilda Christie's auktsionida sotilgan suratiga mos keladi.
Auktsion uyining maʼlum qilishicha, asar Jorj davri bastakori va musiqachisi Charlz Berni tomonidan sotib olingan deb ishoniladi va oʻshandan beri oila aʼzolarida saqlanib qolgan.
Asarning orqa tomonidagi «Sig Canal d Canaletti sovgʻasi» degan yozuv rassom qachonlardir bu asarni kimgadir sovgʻa qilganidan dalolat beradi.
Mallams kompaniyasining tasviriy sanʼat va suratlar boʻyicha direktori Rupert Fogden auktsion uyi ushbu sotuv unga ishonib topshirilganidan «chin dildan mamnun» ekanini aytdi.
«Kanalettoning asl suratlari va rasmlari auktsionga kamdan-kam hollarda chiqadi va biz shu kuzda u kim oshdi savdosiga qoʻyilganda butun dunyo boʻylab xususiy kollektsionerlar va muassasalar tomonidan katta qiziqish boʻlishini kutmoqdamiz», deya qoʻshimcha qildi u.