Javohir Sindarov shaxmat toji uchun bahs oldidan AQShdagi turnir g‘olibi bo‘ldi

Javohir Sindarov shaxmat toji uchun bahs arafasida AQShdagi turnirda zafar quchdi

20 yoshli o‘zbekistonlik shaxmatchi Javohir Sindarov 27−29-oktabr kunlari Sent Luis (AQSh) shaxmat klubida o‘tkazilgan Clutch Chess: Champions Showdown 2026 xalqaro turnirida g‘olib bo‘ldi.

Sindarovning xalqaro turnirlarga, jumladan, bo‘lajak shaxmat toji uchun o‘yinga tayyorgarlik ko‘rishi, ishtirok etishi va murabbiylar bilan ishlashi

Uch kun yakuniga ko‘ra, Sindarov 20,5 ochko to‘plab, eng yaqin ta’qibchisi hindistonlik grossmeyster Rameshbabu Pragnanandhani 1,5 ochkoga ortda qoldirdi.

Yakuniy natijalar:

Mukofot jamg‘armasi 425 ming dollar bo‘lgan musobaqada Sindarov 1-o‘rin uchun 125 ming dollar oldi. Alohida partiyalardagi g‘alabalar uchun qo‘shimcha to‘lovlar va maxsus jekpot bilan birga uning umumiy yutug‘i 168 ming dollarga yetdi.

Clutch Chess: Champions Showdown ketma-ket ikkinchi yil tashkil etildi. 2025-yildagi ilk turnirda norvegiyalik grossmeyster Magnus Karlsen g‘olib chiqqan, ikkinchi o‘rinni esa Fabiano Karuana egallagan edi.

Bu safargi musobaqada to‘rt nafar shaxmatchi qatnashdi, ularning har biri 18 tadan — kuniga oltitadan partiya o‘tkazdi. Raqiblar har kuni bir-birlari bilan ikki martadan oq va qora donalarda o‘yin olib bordi.

Vaqt nazorati har bir partiya uchun 10 daqiqani va har bir yurishdan so‘ng besh soniya qo‘shib berishni nazarda tutdi.

Musobaqaning yana bir o‘ziga xos jihati turnir yakuniga yaqinlashgani sari g‘alabalar qiymatining oshib borishi bo‘ldi. Birinchi kuni yutilgan partiya uchun 1 ochko, ikkinchi kuni 2 ochko, yakuniy kunda esa 3 ochko berildi. Bu shaxmatchilarga hatto oxirgi kuni ham turnir jadvalidagi o‘rnini sezilarli darajada o‘zgartirish imkonini berdi.

G‘alabalar uchun, shuningdek, musobaqa kuniga qarab 1000 dollardan 3000 dollargacha pul bonuslari ham to‘landi.

Birinchi kundan so‘ng to‘rt ochko jamg‘argan Xikaru Nakamura peshqadam bo‘ldi. Sindarov bir g‘alaba va hech qanday mag‘lubiyatsiz 3,5 ochko bilan ikkinchi o‘rinni egalladi.

O‘zbekistonlik shaxmatchi yagona g‘alabasini Pragnanandha ustidan qo‘lga kiritdi. Turli rangli fillar ishtirokidagi endshpilda avvalroq ustunlikka ega bo‘lgan hindistonlik grossmeyster 47-yurishda qo‘pol xatoga yo‘l qo‘ydi va raqibning keyingi yurishidan so‘ng taslim bo‘ldi.

Birinchi kunning so‘nggi partiyasida Sindarov Nakamura ustidan ham g‘alaba qozonishga yaqin keldi. Murakkab endshpilda amerikalik shaxmatchi xatoga yo‘l qo‘yib, yutqazilgan pozitsiyaga tushib qoldi, ammo himoyalanishga va 117-yurishdan so‘ng durangga erishishga muvaffaq bo‘ldi.

Ikkinchi kun Sindarov uchun unchalik omadli kechmadi. U Pragnanandha bilan g‘alabalar almashdi, ammo Karuanaga imkoniyatni boy berdi, bu partiyani u keyinchalik faoliyatidagi eng yomon o‘yinlardan biri deb atadi. Yana uchta uchrashuv durang bilan yakunlandi.

Yakuniy o‘yin kuni oldidan Sindarov va Karuana hisobida 8,5 ochkodan bor edi va ular peshqadamlik qilayotgan Pragnanandhadan 2,5 ochkoga ortda qolishayotgandi.

Hal qiluvchi kunda o‘zbekistonlik grossmeyster birorta ham partiyada mag‘lub bo‘lmadi, xususan, uchta g‘alabaga erishib, uch marta durang o‘ynadi. Avvaliga Sindarov turnir peshqadami Pragnanandha bilan to‘qnash keldi. Birinchi partiya durang bilan yakunlandi, ikkinchisida esa o‘zbekistonlik shaxmatchi raqibining taktik xatosidan unumli foydalandi.

Hindistonlik shaxmatchi markaziy ikkita piyoda evaziga dona qurbon qildi va materialni qaytarib olishga umid qilgan edi. Biroq farzin bilan zarur yurishni amalga oshirish o‘rniga Sindarovga hal qiluvchi taktik imkoniyatni boy berib qo‘ydi.

Keyin o‘zbekistonlik grossmeyster Fabiano Karuanani mag‘lub etdi. Juda kam vaqt qolgan sharoitda amerikalik shaxmatchi noaniqliklarga yo‘l qo‘ydi va Sindarov farzinlarsiz ruxlar endshpilida ikkita piyodalik ustunlikni qo‘lga kiritib, uni g‘alabagacha yetkazdi.

Karuana bilan ikkinchi uchrashuvda Sindarov yana istiqbolli pozitsiyaga ega bo‘ldi, bu safar shoh himoyasini qo‘llab, ammo g‘alabali davomni topa olmadi. Partiya durang bilan yakunlandi.

Turnirning eng yorqin partiyasi Sindarovning oxirgidan oldingi turda qora donalarda Xikaru Nakamura ustidan qozongan g‘alabasi bo‘ldi.

O‘zbekistonlik grossmeyster yana shoh himoyasini tanladi — bu debyutni u hatto dunyoning eng kuchli shaxmatchilariga qarshi o‘yinlarda ham muntazam qo‘llab keladi.

Sindarov filni qurbon qilish bilan raqib shohiga qarshi shiddatli hujum boshladi. Hujum sur’atini susaytirmaslik uchun u keyinchalik ikki marta ustunlikdan kechib, ruxlarini yengil donalarga almashtirdi.

Hujum muvaffaqiyatli chiqdi va Nakamura mag‘lubiyatini tan oldi.

“Bu shoh himoyasida men o‘ynagan eng yaxshi partiyalardan biri bo‘ldi. Hatto qisqa vaqt nazoratida ham juda yaxshi o‘ynadim”, — dedi Sindarov uchrashuvdan so‘ng.

Shaxmatchining so‘zlariga ko‘ra, ma’lum paytda unda g‘alabaga erishishning bir nechta usuli bo‘lgan, biroq u ongli ravishda eng ta’sirli va chiroyli davomni tanlagan.

“Agar chiroyli o‘yin boshlagan bo‘lsam, uni chiroyli yakunlashim ham kerak, deb o‘yladim”, — dedi u.

Chess.com sharhlovchisi ushbu uchrashuvni musobaqaning eng yaxshi partiyasi va yil partiyasi unvoniga da’vogarlardan biri deb atadi.

Nakamura ustidan qozonilgan g‘alabadan so‘ng Sindarov amerikalik shaxmatchi bilan yana bir partiya o‘tkazishi kerak edi. Yakuniy uchrashuvda u ishonchli Berlin himoyasini tanladi va unga birinchi o‘rinni ta’minlagan durangga erishdi.

Pragnanandha oxirgi turgacha turnirda g‘olib chiqish imkoniyatini saqlab qoldi. Biroq Karuanaga qarshi kechgan so‘nggi partiyada qora donalarda o‘ynagan hindistonlik grossmeyster xatoga yo‘l qo‘yib, raqibga o‘z farzinini qopqonga tushirishga imkon berdi. Oqibatda u imkoniyatni boy berib, musobaqani ikkinchi o‘rinda yakunladi.

Sent Luisdagi g‘alaba Javohir Sindarov uchun Hindiston vakili Gukesh Dommarajuga qarshi jahon chempionligi unvoni uchun kechadigan bahs oldidan rasmiy musobaqalardagi so‘nggi ishtirok bo‘ldi.

Sindarov natijadan ham, AQShda o‘tkazgan vaqtidan ham mamnun ekanini ta’kidladi. U, shuningdek, turnir tashkilotchilari va sharhlovchilariga o‘z minnatdorchiligini bildirdi.

2026-yilning 22-noyabridan 12-dekabriga qadar Jenevada (Shveysariya) bo‘lib o‘tadigan dunyo toji uchun bahs bo‘ladi. Birinchi partiya 24-noyabrga rejalashtirilgan.

Xalqaro shaxmat federatsiyasi (FIDE) reglamentiga ko‘ra, raqiblar klassik vaqt nazorati ostida 14 tagacha partiya o‘tkazadi. Agar ularning yakunlari bo‘yicha hisob teng bo‘lib qolsa, chempion 12-dekabr kuni tay-breykda aniqlanadi.

Sindarov 2026-yilgi Nomzodlar turnirida g‘olib chiqib, dunyo toji uchun o‘ynash huquqini qo‘lga kiritgandi. Gukesh esa 2024-yil dekabrida xitoylik grossmeyster Din Lijenni mag‘lub etib, jahon chempioni bo‘lgan edi.

O‘yin boshlangan paytda ikkala shaxmatchi ham 20 yoshda bo‘ladi. Bu shaxmat tarixida ishtirokchilarining yoshi bo‘yicha eng yosh jahon chempionligi bahsiga aylanadi.