Jarima ballari qanday qoidabuzarliklar uchun hisoblanadi va qachon haydovchilik huquqidan mahrum qilinish mumkin?
Oʻzbekistonda 2025-yil 1-iyundan jarima ballari tizimi ishga tushdi. Aksariyat haydovchilar: 12 ball toʻplasam, huquqimdan mahrum boʻlaman, deb oʻylaydi. Aslida esa chegara boshqacha, qarorni sud qabul qiladi, ballar esa har doim ham transport vositasini boshqargan shaxsga yozilmaydi.Qaysi qoidabuzarliklar uchun ballar hisoblanishi, har bir qoidabuzarlik uchun qancha ball berilishi, ular qachon bekor boʻlishi va ballar xato hisoblangan boʻlsa, nima qilish kerakligi haqida soʻz yuritamiz.
Jarima ballari qaysi qoidabuzarliklar uchun hisoblanadi va qachon haydovchilik huquqidan mahrum etish mumkin?
Ballar jarimani almashtirmaydi. Ular odatiy jazo bilan birga hisoblanadi.
Har bir qoidabuzarlik uchun 0,2 balldan 2 ballgacha beriladi. Bir martada 2 balldan ko‘p hisoblanmaydi.
Ballar YHQning barcha qoidabuzarliklari uchun emas, balki MJtKning 34¹-moddasida sanab o‘tilgan qoidabuzarliklar uchun beriladi.
Jarimani to‘lash ballni hisobdan chiqarmaydi. Hatto u birinchi kuniyoq chegirma bilan to‘langan bo‘lsa ham.
8 ball to‘planganda SMS-ogohlantirish yuboriladi.
Haydovchilik huquqi 12 ballda emas, balki ballar yig‘indisi 12 balldan oshganda xavf ostida qoladi.
Haydovchilik huquqidan sud mahrum qiladi, tizim yoki inspektor emas. Ballar asosida mahrum qilish muddati 6 oydan kam bo‘lishi mumkin emas.
Yarim yil davomida yangi balli qoidabuzarlik bo‘lmasa, 2 ball ayriladi.
Kamera qayd etgan qoidabuzarlik bo‘yicha ballni haqiqiy haydovchiga biriktirish mumkin, ammo buning uchun avtomobilni boshqa shaxsga berish rasmiylashtirilgan bo‘lishi kerak.
Mast holda transport boshqarish va tibbiy tekshiruvdan o‘tishdan bosh tortish har qanday ballsiz ham darhol huquqdan mahrum qilishga olib keladi.
Ballar jarimani almashtirmaydi. Haydovchi qoidabuzarlik uchun Maʼmuriy javobgarlik to‘g‘risidagi kodeks bo‘yicha asosiy jazoni — jarima yoki ogohlantirish oladi. Qo‘shimcha ravishda, agar ushbu modda ball beriladigan ro‘yxatga kirsa, 0,2 balldan 2 ballgacha oladi.
Bir qoidabuzarlik uchun eng ko‘p miqdor — 2 ball. Qoidabuzarlik qanchalik og‘ir bo‘lmasin, undan ortiq ball hisoblanmaydi.
Jarimani to‘lash ballni bekor qilmaydi. Bu ikki xil narsa. Siz jarimaning 100, 70 yoki 50 foizini to‘lasangiz ham, ballar hisobda qoladi.