Janubiy Koreya sobiq birinchi xonimining qamoq muddati besh yilga qisqartirildi
Janubiy Koreya sobiq birinchi xonimining qamoq muddati besh yilga tushirildi
Janubiy Koreya apellyatsiya sudi mamlakat sobiq prezidenti Yun Sok Yolning turmush o‘rtog‘i Kim Gon Xining qamoq muddatini kamaytirdi. 22-sentyabr kuni e’lon qilingan qarorga ko‘ra, uning jazosi 7 yildan 5 yilga qisqartirildi. U tadbirkorlar va boshqa shaxslardan noqonuniy sovg‘alar olganlikda ayblangan edi.
Ma’lum bo‘lishicha, Seul yuqori sudi Kim Gon Xiga qo‘yilgan ayrim korrupsiyaviy ayblovlarni bekor qilgan. Jumladan, tadbirkor So Song Bindan qimmatbaho soat olgani haqidagi ayblov olib tashlangan. Mazkur tadbirkor o‘zining robot-itlar biznesi uchun davlat ko‘magiga erishmoqchi bo‘lgan.
Iyun oyida Seul markaziy tumani sudi Kimni soatni olgani uchun aybdor deb topgan edi. Biroq 22-sentyabr kuni yuqori sud ayblovchilar bu soat biznesdagi yordam evaziga berilganini yetarli darajada isbotlay olmaganini bildirdi. Shu bilan birga, sud unga qo‘yilgan boshqa ayblovlarning aksariyatini kuchda qoldirdi.
Kimning advokatlari qolgan ayblovlarni ham bekor qildirish uchun Oliy sudga apellyatsiya berishini aytdi. Ularning ta’kidlashicha, prokurorlar uning aybini to‘liq va shubhasiz isbotlay olmagan.
Maxsus prokuror Min Jung Ki boshchiligidagi tergov guruhi a’zosi Kim Xan Suning aytishicha, prokuratura ham ushbu qaror ustidan shikoyat qiladi.
“Birinchi xonimning hal qilinmagan ishlari bor tadbirkordan o‘n millionlab von turadigan soatni qabul qilishi jinoyat emasligini qabul qilish qiyin”, dedi u jurnalistlarga.
Aprel oyida yuqori sud boshqa bir ish bo‘yicha Kim Gon Xini 4 yilga ozodlikdan mahrum qilgan edi. O‘shanda u Birlashuv cherkovidan sovg‘alar olganlikda va aksiyalar narxini sun’iy oshirish sxemasidan foyda ko‘rganlikda ayblangan. U bu hukm ustidan ham apellyatsiya bergan.
22-sentyabr kuni kuchda qoldirilgan ayblovlar orasida Van Cleef & Arpels marjonini va boshqa zargarlik buyumlarini olish holati bor. Umumiy qiymati 100 million vondan (73,500 dollar) ortiq bo‘lgan bu sovg‘alar 2022-yilda Seohee Construction kompaniyasi raisi Li Bon Kvandan olingan. Buning evaziga uning kuyoviga davlat lavozimi olib berilgan.
Shuningdek, Kim boshqa shaxslardan ham sovg‘alar olganlikda aybdor deb topilgan:
Choy Je Yongdan Dior sumkasi va boshqa sovg‘alar olgan. U fuqarolik diplomatik delegatsiyasiga va davlat dasturlariga qo‘shilishni istagan.
Milliy ta’lim komissiyasining sobiq rahbari Li Be Yongdan oltin toshbaqa olgan.
Sobiq katta prokuror Kim Sang Mindan mashhur rassom Li Ufanning 140 million vonlik (102,900 dollar) kartinasini olgan. Kim Sang Min 2024-yilgi parlament saylovlarida Yunning konservativ partiyasidan nomzod bo‘lishni xohlagan.
Sobiq prezident Yun Sok Yol 2024-yil dekabr oyida muxolifat bilan kelishmovchilik ortidan harbiy holat joriy etgan edi. Shundan so‘ng unga impichment e’lon qilindi va u 2025-yil aprelida lavozimidan chetlatildi. U 2025-yil iyul oyida hibsga olindi. Hozirda sobiq yetakchi bir nechta ishlar bo‘yicha sudlanmoqda va isyon ko‘targani uchun berilgan umrbod qamoq jazosi ustidan apellyatsiya bergan.
2025-yilda Yunning o‘rniga o‘tkazilgan muddatidan ilgari prezidentlik saylovida liberallar nomzodi Li Je Myong g‘alaba qozondi. U Yunning harbiy holat joriy etishi hamda uning hukumati va rafiqasiga aloqador boshqa ayblovlar bo‘yicha maxsus prokurorlarga bir nechta tergov o‘tkazishga ruxsat berdi.