Janubiy Afrikadagi uyda sodir boʻlgan ommaviy otishmada 11 kishi halok boʻldi
Halok boʻlganlardan biri homilador ayol boʻlgani taxmin qilinmoqda, deb xabar berdi politsiya.
Janubiy Afrikadagi uyda sodir boʻlgan ommaviy otishmada 11 kishi halok boʻldi
Janubiy Afrika qotillik darajasi boʻyicha dunyoda eng yuqori koʻrsatkichlardan biriga ega
Janubiy Afrikaning Durban shahri yaqinidagi turar joy binosida sodir boʻlgan ommaviy otishmada kamida 11 kishi halok boʻldi.
Seshanba kuni kechqurun qurollangan shaxslar KvaMaxuta shaharchasidagi uyga bostirib kirib, 14 kishiga qarata oʻt ochgan. Politsiyaning maʼlum qilishicha, 10 kishi voqea joyida halok boʻlgan, toʻrt kishi shifoxonaga yotqizilgan va ulardan biri keyinchalik olgan jarohatlari tufayli vafot etgan.
Politsiyaning bildirishicha, qurbonlarning ayrimlari noqonuniy faoliyatga aloqadorlikda gumonlanib kuzatuv ostida boʻlgan, biroq bu maʼlumotlarni «boshlangan tergov harakatlarini himoya qilish maqsadida hozircha oshkor qila olmasliklarini» qoʻshimcha qildi.
Garchi qotillik sabablari hali tasdiqlanmagan boʻlsa-da, politsiya «raqib guruhlar oʻrtasidagi adovat» ehtimolini istisno eta olmasligini aytdi.
«Ushbu bosqichda mavjud boʻlgan maʼlumotlarga koʻra, 13 erkak va homilador ekani taxmin qilinayotgan bir ayol uy ichida bazm oʻtkazayotgan boʻlgan, shu payt uch nafar erkak kelib, ularga qarata oʻt ochgan», deyiladi politsiya bayonotida. Halok boʻlganlar orasida oʻsha ayol ham bor.
Voqea joyida boʻlgan eNCA telekanalining mahalliy muxbiri qurollangan shaxslar qochib ketishdan oldin qurbonlardan biriga tegishli boʻlgan mashinaga oʻt qoʻyib yuborganini xabar qildi, videokadrlarda yonib ketgan avtomobil aks etgan.
Janubiy Afrika qotillik darajasi boʻyicha dunyoda eng yuqori koʻrsatkichlardan biriga ega boʻlib, politsiya maʼlumotlariga koʻra, bu koʻrsatkich kuniga 60 dan ortiq oʻlimga toʻgʻri keladi.
Soʻnggi haftalarda kamida toʻqqiz nafar oʻldirilgan ayolning dahshatli tarzda topilishi va jasadlarning baʼzilari yoʻl chetiga tashlab ketilgani mamlakatda xavotirlarni kuchaytirdi.
Oʻtgan yili Yoxannesburgdagi tavernada sodir boʻlgan ommaviy otishmada toʻqqiz kishi halok boʻlgan edi.