J. Koreyalik magnat rekord darajadagi ajrashish jarayonida sobiq rafiqasiga 1,87 milliard dollar toʻlaydi
Smilegate oʻyin kompaniyasiga asos solgan Kvon 3 milliard dollarlik boyligi bilan Koreyaning eng boy odamlaridan biridir.
Janubiy Koreyalik magnat sobiq rafiqasiga rekord darajadagi ajrim kelishuvi sifatida 1,87 milliard dollar toʻlaydi
Janubiy Koreya sudi geyming magnati Kvon Xyok Binga sobiq rafiqasiga aktivlar koʻrinishida 2,55 trillion von (1,87 milliard dollar; 1,38 milliard funt sterling) toʻlash majburiyatini yukladi, bu mamlakat tarixidagi eng yirik ajrim kelishuvi boʻldi.
Janubiy Koreyaning uchinchi yirik videooʻyinlar kompaniyasi boʻlmish Smilegate asoschisi Kvon mamlakatning eng boy odamlaridan biridir. Bloomberg uning boyligini 3 milliard dollarga baholamoqda.
Chorshanba kuniga qadar Smilegate toʻliq unga tegishli edi, biroq sud kompaniyaning taxminan 2,5 trillion von qiymatiga ega 35 foizlik ulushi uning rafiqasi Li Xva Jinga berilishi kerakligi haqida qaror chiqardi. Shuningdek, unga rafiqasiga yana 65 milliard von naqd pul toʻlash majburiyati yuklandi.
Bu mablagʻ texnologiya magnati Chey Te Vonga sobiq rafiqasiga berish majburiyati yuklangan avvalgi rekord — 944 milliard vondan ikki baravar koʻpdir.
Li Kvon bilan ajrashish uchun ariza berganida, Smilegate kompaniyasining 50 foizlik ulushini talab qilgan edi. Bloomberg xabariga koʻra, uning advokatlari Li kompaniya tashkil etilganda uni moliyalashtirishga yordam berganini taʼkidlashgan.
Kvon va Li 2001 yilda, u Smilegate kompaniyasini ishga tushirishidan bir yil oldin turmush qurishgan. Kompaniyaning eng mashhur oʻyinlari qatoriga birinchi shaxs nomidan otishma janridagi CrossFire va jangovar rolli Lost Ark oʻyinlari kiradi.
Li, shuningdek, 20 yildan ortiq vaqtini farzandlarini tarbiyalash va roʻzgʻor yumushlariga sarflaganini aytgan.
Kvon esa, oʻz navbatida, Li kompaniyaga sarmoya kiritmaganini va u yerda ishlamaganini daʼvo qilgan. Shu yil boshida Smilegate kompaniyaning barcha boshlangʻich kapitali Kvon tomonidan kiritilgani haqida bayonot bergan edi.
Smilegate вакили "yirik aktsiyadorning shaxsiy ishlariga izoh berishdan" bosh tortdi.
"Biz oʻz vazifalarimizni odatdagidek sodiqlik bilan bajarishda davom etamiz", deyiladi ularning The Chosun Daily nashri keltirgan bayonotida.
Har ikki tomon ham ushbu qaror ustidan apellyatsiya berishi mumkin.
Shu yilning iyul oyida SK Group konglomerati raisi Chey Te Vonga sobiq rafiqasiga 944 milliard von toʻlash majburiyati yuklangan edi, bu bugungi qarorga qadar Koreya tarixidagi eng yirik ajrim toʻlovi hisoblanardi.
Biroq keyinroq Oliy sud er-xotin aktivlarining qiymatini oshirib yuborgan notoʻgʻri hisob-kitobga ishora qilib, ushbu qarorni bekor qildi. Sud ishni qayta koʻrib chiqishni buyurdi.