Italiyadagi shahar markazida velosipedda yurish taqiqlandi
Iyun oyida shahar merini elektrovelosiped urib yuborgan va qochib ketgan.
**Italiyada shahar markazida velosipedda harakatlanishga cheklovlar kiritildi**
Italiyaning Komo shahri hokimi Alessandro Rapineze shaharning tarixiy qismida velosipedda yurishni taqiqlashga qaror qildi. Bu qaror hokimning o‘zini elektrovelosiped urib yuborganidan so‘ng qabul qilindi.
Joriy yilning sentyabr oyidan boshlab shahardagi qariyb 30 ta ko‘chada velosiped haydash man etiladi. Velosipedchilar ushbu hududlarda o‘z velosipedlarini yetaklab, piyoda yurishlariga to‘g‘ri keladi.
Ushbu chora mahalliy aholi orasida noroziliklarga sabab bo‘ldi. Faollar taqiqni bekor qilish uchun imzo to‘plashni boshlab yuborishdi. Velosipedchilar esa sentyabr o‘rtalarida taqiqlangan ko‘chalarda norozilik marshini o‘tkazishni rejalashtirmoqdalar.
"Meni elektrovelosiped urib yuborgani uchun bu qarorni chiqarganlikda ayblashmoqda. Bu shubhasiz to‘g‘ri. Inson o‘z tajribasidan kelib chiqib harakat qiladi va men bu ablahlardan biri urib ketishi qanday bo‘lishini yaxshi bilaman", – dedi Rapineze.
Iyun oyida hokim shahar ma’muriyati binosidan chiqib kelayotganida uni elektrovelosiped urib yuborgan va haydovchi voqea joyidan qochib ketgan edi.
Rapineze ushbu taqiqni sayyohlar gavjum joylarda xavfsizlikni ta’minlash zarurati bilan izohladi. Cheklov oddiy velosipedlarga ham, elektrovelosipedlarga ham birdek taalluqli bo‘ladi.