IT Park va Truss Özbekistonda EOR modelini sinovdan ötkazadi
IT Park Uzbekistan va AQŞning Truss kompaniyasi Özbekistonda EOR modelini sinovdan ötkaziş, xorijiy mutaxassislarni işga yollaş va IT hamkorligini kengaytirişni rejalaştirmoqda.
**IT Park va Truss O‘zbekistonda EOR modelini sinovdan o‘tkazadi**
IT Park Uzbekistan va AQShning Lincoln Labs texnologik kompaniyasi loyihasi bo‘lgan Truss O‘zbekistonda Employer of Record (EOR) modelini qo‘llash bo‘yicha pilot loyihani ishlab chiqadi.
Tomonlar O‘zbekistondan muhandislik jamoalarini shakllantirish, mutaxassislarni xalqaro miqyosda ishga yollash va Amerika kompaniyalari faoliyatini kengaytirish uchun maydon sifatida foydalanish imkoniyatlarini muhokama qildi.
Uchrashuvda IT Park eksportni rivojlantirish boshqarmasi rahbari Azamat Rahmon-Zoda, global biznes xizmatlari (GBS) yo‘nalishi vakillari, shuningdek, Lincoln Labs vakili Erik Jiru hamda Truss vakili Ilhom Ikromov ishtirok etdi.
EOR modeli kompaniyalarga mamlakatda o‘z yuridik shaxsini tashkil etmasdan, rasmiy ish beruvchi orqali mutaxassislarni ishga yollash imkonini beradi.
Tomonlar xorijiy mutaxassislarni jalb qilish, masofadan ishlash va O‘zbekistondan tashqarida faoliyat yuritayotgan xodimlarga ish haqi to‘lashni o‘z ichiga olgan turli ishga joylashtirish shakllarini ko‘rib chiqdi.
Shuningdek, modelni amalga oshirishning huquqiy shartlari, jumladan, Prezidentning 286-son farmoni qoidalari alohida muhokama qilindi. Truss bilan amalga oshiriladigan pilot loyiha EOR mexanizmining amaliyotda qanday ishlashini ko‘rsatishi kerak.
Lincoln Labs texnologik konsalting yo‘nalishini rivojlantirmoqda va yangi bozorlarni sinab ko‘rish uchun kichik dasturchilar jamoasini tashkil etish imkoniyatini ko‘rib chiqmoqda.
O‘zbekiston kompaniya uchun ehtimoliy maydonlardan biri hisoblanadi. Lincoln Labs kompaniyasining hammuassisi va texnik direktori Farrux Umarov O‘zbekistondan chiqqan. Truss esa xalqaro kompaniyalarga muhandislarni topish, ishga yollash va ularni jamoalarga integratsiya qilishda yordam beradi.
IT Park vakillari milliy IT-ekotizim, rezidentlarning xalqaro buyurtmachilar, jumladan, UFC, HBO va ESPN bilan ishlash tajribasi hamda xorijiy kompaniyalarni qo‘llab-quvvatlash mexanizmlari, shu jumladan, Softlanding dasturi haqida ma’lumot berdi.
Tomonlar Amerika bozoridagi hamkorlik masalalarini ham muhokama qildi. Truss IT Parkka ehtimoliy xorijiy rezidentlar bilan aloqalar o‘rnatishda yordam berishga va Amerika kompaniyalarini O‘zbekistonda biznes yuritish shartlari bilan tanishtirishga tayyorligini bildirdi.
Lincoln Labs va Truss vakillari 2027 yil bahorida O‘zbekistonda o‘tkazilishi rejalashtirilgan Offshore Outsourcing Tour tadbirida ishtirok etishga taklif qilindi.