Isroildagi saylovlar: Netanyahu bloki oldinda, ammo ko‘pchilik o‘rinni qo‘lga kirita olmadi
Isroilda o‘tgan parlament saylovlarida bosh vazir Binyamin Netanyahu boshchiligidagi blok yetakchilik qilmoqda. Byulletenlarning 93 foizi hisoblab chiqilgach, Netanyahuni qo‘llovchi partiyalar 53 ta, muxolifat esa 48 ta mandatga ega bo‘lmoqda. Parlamentda ko‘pchilikni shakllantirish uchun 61 ta o‘rin zarur.
Isroildagi saylovlar: Netanyahu bloki yetakchilik qilmoqda, biroq ko‘pchilik o‘ringa yetmadi
Isroil parlamentiga bo‘lib o‘tgan saylovlarda mamlakatning amaldagi bosh vaziri Binyamin Netanyahuni qo‘llab-quvvatlovchi blok oldinda ketmoqda, deb xabar bermoqda The Times of Israel Markaziy saylov komissiyasiga tayanib.
Byulletenlarning 93 foizi hisoblab chiqilgach, Netanyahu koalitsiyasi Knessetdagi 120 o‘rindan 53 tasini qo‘lga kiritmoqda. Shundan 26 ta mandat bosh vazirning shaxsiy “Likud” partiyasiga tegishli.
Isroil armiyasi Bosh shtabining sobiq rahbari Gadi Ayzenkot boshchiligidagi muxolifat bloki 48 o‘ringa da’vogarlik qilmoqda.
Arab partiyalaridan iborat ikki siyosiy kuch esa o‘z tarixidagi eng yaxshi natijani qayd etib, 19 ta mandatga ega bo‘ldi. Hukumat tuzish va yetakchi koalitsiyaga aylanish uchun siyosiy blok kamida 61 ta o‘ringa ega bo‘lishi kerak.
Qolgan ovozlar yaqin kunlarda sanab chiqiladi. Saylovning rasmiy natijalari 4-noyabr kuni e’lon qilinishi kutilmoqda. Ham Netanyaxu, ham Ayzenkot o‘z tarafdorlari oldida chiqish qilib, hukumatni aynan o‘zlari tuzishlarini bildirdi.
“O‘ng qanot bloki sionistik jamoatchilik va davlatni qo‘llab-quvvatlovchi barcha kuchlar orasida yaqqol, hal qiluvchi ustunlikka ega. Biz kuchli milliy o‘ng hukumat qurishimiz lozim. Isroilni xavf ostiga qo‘yib, sionizmga qarshi arab partiyalariga tayanadigan hukumat tuzishga aslo yo‘l qo‘yib bo‘lmaydi”, — dedi Netanyahu.
Ayzenkot esa Isroil xalqi amaldagi rahbariyatni almashtirish uchun ovoz berganini ta’kidladi.
“Jamiyat o‘zgarishni tanladi. „Omadsizlar koalitsiyasi“ xalq ishonchini oqlay olmadi. Isroilliklar Binyamin Netanyahuning bosh vazir lavozimida qolishiga qarshi ovoz berdi. Men xalq xohish-irodasi barcha fuqarolar manfaatiga xizmat qiluvchi barqaror va farovon sionistik hukumatga aylanishi uchun hamkorlarim bilan birga ish olib boraman”, — dedi u.
Agar birorta ham partiya kerakli miqdordagi o‘rinni ololmasa, mamlakatda koalitsiya tuzish bosqichi boshlanadi. Ovozlar to‘liq sanab bo‘lingach, mamlakat prezidenti partiyalar yetakchilari bilan muzokara o‘tkazadi va ko‘pchilik deputatlarning qo‘lloviga erisha oladigan nomzodga yangi hukumatni tuzish topshirig‘ini beradi.
Koalitsiya shakllantirish uchun 28 kun beriladi, zarur bo‘lsa, bu muddat yana 14 kunga uzaytiriladi.
Agar ko‘rsatilgan nomzod belgilangan vaqtda hukumat tuza olmasa, prezident bu vazifani boshqa birovga yuklashi mumkin. Ikkinchi urinish ham natija bermasa, Knesset deputatlari prezidentdan boshqa bir uchinchi nomzodni ko‘rsatishni so‘rash huquqiga ega.
Shundan so‘ng ham kelishuvga erishilmasa, mamlakatda yangi parlament saylovlari tayinlanadi.