Ispaniya transport vaziri 69 kişi halok bölgan fojiadan söng isteʼfo berdi

Ispaniya transport vaziri 69 kishi halok bo‘lgan fojiadan so‘ng iste’foga chiqdi

Uning iste’fosi fojiadan qariyb bir hafta o‘tib e’lon qilindi.

«Bir yilga yetmagan vaqt ichida bunday ko‘lamdagi ikkita halokatdan keyin vazir o‘z lavozimida qolishi mumkin emas», - degan Puente. U iste’foga chiqish qarorini siyosiy sha’n va mas’uliyat masalasi bilan izohlagan.

dpa agentligiga ko‘ra, vazirning iste’fosini barcha muxolifat partiyalari talab qilgan. Biroq Puente va Ispaniya bosh vaziri Pedro Sançes bunga qadar vazirning lavozimdan ketishi ehtimolini bir necha bor rad etgani uchun bu qaror kutilmagan bo‘lgan.

Puentening bayonotidan bir necha soat oldin Ispaniya hukumati temiryo‘l qatnovi xavfsizligini oshirish choralarini tasdiqlagan. Shuningdek, jabrlanganlar va halok bo‘lganlarning oilalari uchun 30 million yevro miqdoridagi yordam paketi ma’qullangan.

Temiryo‘l halokati 28-oktabr kuni soat 08:53 da Toledo provinsiyasidagi Urda aholi punkti yaqinida, Madrid - Sevilya tezyurar temiryo‘l yo‘nalishida yuz bergan. AVE 2080 yo‘lovchi poyezdi yo‘lda to‘xtab turgan Iryo 6076 poyezdining oxirgi vagoniga borib urilgan. Oqibatda 69 kishi halok bo‘lgan, 50 dan ortiq odam jarohatlangan.

2026-yil boshidan buyon Ispaniyada yo‘lovchilar jabrlangan yettita temiryo‘l halokati qayd etilgan. Ulardan yana biri 18-yanvar kuni Madrid - Malaga tezyurar yo‘nalishida, Adamus aholi punkti yaqinida sodir bo‘lgan. Ikki poyezd ishtirokidagi o‘sha halokatda 46 kishi hayotdan ko‘z yumgan, yana 150 kishi turli darajada jarohat olgan.

Adamusdagi halokatning ehtimoliy sabablaridan biri sifatida temiryo‘l izlarining shikastlangani ko‘rib chiqilmoqda. Urdadagi hodisa bo‘yicha tergovda esa poyezdlarni avtomatik himoyalash tizimi ishdan chiqqan bo‘lishi hamda dispetcherlik markazi ko‘rsatmalarida ehtimoliy xatolarga yo‘l qo‘yilgani tekshirilmoqda.