Iqtisodiyotda davlat ishtiroki qisqarmoqda
Davlat korxonalari va muassasalarini saqlab qolish, xususiylashtirish, qayta tashkil etish yoki tugatish zarurligini aniqlash uchun ularning faoliyatini har yili baholash tizimi joriy etilmoqda. Davlat ulushlarini xususiylashtirishdan oldin Raqobatni rivojlantirish va isteʼmolchilar huquqlarini himoya qilish qoʻmitasining tegishli sohadagi raqobat holati toʻgʻrisidagi xulosasini olish ham talab etiladi.
Iqtisodiyotda davlat ishtiroki qisqartirilmoqda
Iqtisodiyotda davlat ishtirokini qisqartirish va raqobat muhitini rivojlantirish boʻyicha qoʻshimcha chora-tadbirlar tasdiqlandi.
Hujjat davlat mulkini boshqarish va xususiylashtirish toʻgʻrisidagi qonunchilikni amalga oshirish, shuningdek, davlat institutlarini isloh qilishni jadallashtirish maqsadida qabul qilingan.
Davlat korxonalari har yili xatlovdan oʻtkaziladi
Belgilangan mezonlarga muvofiq, davlat organlari Davlat aktivlarini boshqarish agentligi va boshqa manfaatdor idoralar bilan birgalikda har yili davlat korxonalari faoliyatini xatlovdan oʻtkazadi.
Baholash yakunlari boʻyicha saqlab qolish, xususiylashtirish, tugatish yoki qayta tashkil etish taklif etilayotgan korxonalar roʻyxati shakllantiriladi. Tayyorlangan roʻyxat tasdiqlash uchun Vazirlar Mahkamasiga taqdim etiladi.
Bunda xoʻjalik yurituvchi subʼyektning ustav fondi yoki kapitalidagi davlat ulushi xususiylashtirilishidan oldin Raqobatni rivojlantirish qoʻmitasi yoki uning hududiy boʻlinmasining tegishli faoliyat sohasidagi raqobat holati toʻgʻrisidagi xulosasi talab etiladi.
Davlat muassasalari ham baholanadi
Raqobatni rivojlantirish qoʻmitasi tegishli vazirlik va idoralar bilan birgalikda har yili 1 mayga qadar davlat muassasalari faoliyatini sharhlab boradi.
Tahlil natijalariga koʻra, Davlat aktivlarini boshqarish agentligiga ushbu muassasalarni xususiylashtirish yoki tugatish toʻgʻrisida takliflar yuboriladi.
Bundan tashqari, davlat aktsiya paketlari yoki ulushlarini xususiylashtirish rejalashtirilayotgan xoʻjalik yurituvchi subʼyektlar va davlat muassasalari faoliyat sohalaridagi raqobat holati toʻgʻrisida monopoliyaga qarshi organning xulosalarini tayyorlash va koʻrib chiqish tartibi tasdiqlandi.
Davlat muassasalarini xususiylashtirish, saqlab qolish yoki tugatish toʻgʻrisidagi takliflarni tayyorlash va koʻrib chiqish tartibi alohida belgilandi.
Hujjat Qonunchilik maʼlumotlari milliy bazasida davlat tilida eʼlon qilingan va 30.09.2026 y.dan kuchga kirdi.