Ipdan xaridorgacha: Zelal Textile Wildberries orqali kiyim brendini qanday rivojlantirmoqda?
O‘zbekistonning Zelal Textile kompaniyasi mato ishlab chiqarish va kiyim tikishni birlashtirdi. Kompaniya xaridorlarning fikr-mulohazalaridan o‘zining DNZ brendini rivojlantirishda foydalanmoqda.
Ipdan xaridorgacha: Zelal Textile Wildberries orqali kiyim brendini qanday rivojlantirmoqda?
Ikki yarim yil ichida DNZ assortimenti bir modeldan 400 tagacha kengaydi. Kompaniya bergan ma’lumotga ko‘ra, shu davr mobaynida xaridorlar ikki milliondan ortiq mahsulot xarid qilgan. Bu raqamlar ortida modelerlar, texnologlar, tikuvchilar hamda talabni o‘rganib, mijozlar istaklarini ishlab chiqarishga yetkazadigan mutaxassislarning mehnati turibdi. Mahsulotning to‘qimachilik sexidan marketpleys omborigacha bo‘lgan yo‘li Wildberries va Afisha Media maxsus loyihasining ikkinchi sonida yoritilgan.
Ishlab chiqarish uskunalarni sozlashdan boshlanadi
Kompaniya vakillarining aytishicha, bugun mato ishlab chiqarishda 1200 kishi, kiyim tayyorlashda esa yana 2500 kishi ishlaydi. Kuniga 100 tonna mato ishlab chiqariladi.
Paxtadan tayyor mahsulotgacha va uni marketpleysda sotishgacha bo‘lgan jarayon bu yerda 12 bosqichga bo‘lingan. Ip to‘quv mashinalariga kelib tushadi va u yerda hali bo‘yalmagan hamda ishlov berilmagan xom matoga aylanadi. Shundan keyin bo‘yash, naqsh bosish, ishlov berish, bichish, tikish va jo‘natishga tayyorlash bosqichlari keladi.
Bo‘lajak kiyimning ko‘plab xususiyatlari trikotaj to‘qish bosqichidayoq belgilanadi. Mutaxassislar matoning eni va zichligini keyingi bosqichlardagi o‘zgarishlarni hisobga olgan holda hisoblaydi: bo‘yashdan so‘ng mato kirishadi, ishlov berish va naqsh bosish esa uning vazniga ta’sir qiladi.
Laboratoriyada har bir mato turi uchun rang retsepturasi tanlanadi. Uskunalar 12 tagacha rangdan foydalanib naqsh bosish imkonini beradi. Qoliplar takroriy buyurtmalar uchun saqlanadi, xuddi shu natijani qayta olish uchun esa matoga qanday ishlov berilgani qayd etiladi.
Shu bilan birga, kompaniya vakillari insonni texnika bilan to‘liq almashtirish qiyin, deb hisoblaydi: paxtaning xususiyatlari o‘zgarib turadi va u bilan ishlash tajriba talab qiladi. Yaxshi ustani tayyorlash uchun yillar kerak bo‘ladi.
Xaridorlar nimani o‘zgartirishni o‘zlari aytadi
Zelal Textile sexining xususiy kiyim-kechak brendi DNZ uchun Wildberries ilk savdo maydonchasi hamda mijozlar fikr-mulohazalarini olish kanali bo‘ldi. Xaridorlar yangi rang va o‘lchamlarni so‘raydi, matoni qalinroq yoki yengilroq qilishni taklif etadi, to‘plamning ust yoki pastki qismini alohida sotib olish mumkinligi bilan qiziqadi.
“Ilgari har qanday fabrika xaridorlar fikrini bir yil davomida olgan bo‘lardi. Hozir esa uni darhol olyapmiz. Mijozlarning o‘zi bizga yo‘nalish beryapti”, — deydi Zelal Textile tijorat direktori Ekrem Ugerem.
Sharhlar tegishli bo‘limlarga yetkaziladi va assortiment ustida ishlashda inobatga olinadi. Kompaniya Wildberries tahliliy ma’lumotlaridan ham foydalanadi. Kompaniya ma’lumotiga ko‘ra, 400 ta model ranglari hisobga olinganda qariyb 1600 ta mahsulot kartochkasida taqdim etilgan. Buyurtmalar MDHning turli hududlaridan, jumladan, Yoqutistondan keladi. Asosiy talab esa Rossiyaning Markaziy va Volgabo‘yi okruglariga to‘g‘ri keladi.
Savdo o‘sib borayotgan bir paytda kompaniya mahsulotni haqqoniy ko‘rsatish muhimligini alohida ta’kidlaydi: fotosuratlar xaridor buyurtmada oladigan mahsulotga mos bo‘lishi kerak. Haddan tashqari yuqori kutilmalar xaridorning hafsalasini pir qilishi mumkin.
Narx va sifat muvozanati
Yangi kolleksiya ustidagi ish modellashtirish sexida boshlanadi. Dizaynerlar modellarni yaratadi, keyin jamoa namunalarni tikib, menejerlar bilan kelishadi. Tayyorgarlik uch mavsum oldindan boshlanishi mumkin.
Tasdiqlashda nafaqat tashqi ko‘rinish, balki mato, furnitura va ishlab chiqarish xarajatlari ham baholanadi. Hatto qiziqarli model ham yakuniy narxi xaridor uchun juda qimmat bo‘lsa, sotuvga chiqmasligi mumkin.
“Biz doim narx, sifat va mahsulotning jozibadorligi o‘rtasida muvozanat topishga harakat qilamiz”, — deya qayd etdi kompaniya.
Kelishuvdan so‘ng mato bichishga, keyin esa tikuv fabrikalariga yuboriladi. Tayyor kiyimlar bevosita marketpleys omborlariga jo‘natish uchun Wildberries talablariga muvofiq qadoqlanadi va markirovkalanadi.
Zelal Textile’ning navbatdagi maqsadi — ishlab chiqarilayotgan barcha matoni tayyor kiyim ishlab chiqarishga yo‘naltirish. Kompaniya hisob-kitobiga ko‘ra, 100 tonna matodan kuniga qariyb 250 mingta mahsulot tayyorlash mumkin. Korxona ishlab chiqarish va DNZ assortimentini kengaytirib, bu ko‘lamga bosqichma-bosqich yetishni rejalashtirmoqda.