Husiylar Saudiyaning 4 ta shahriga hujum qildi (video)
Husiylar Saudiyaning 4 ta shahriga zarba berdi (video)
Eron tomonidan qo‘llab-quvvatlanadigan Yaman husiylari 8-sentyabr kuni AQSH ittifoqchisi bo‘lgan Saudiya Arabistonining janubidagi to‘rtta shaharga hujum qildi. Natijada 70 dan ortiq odam jarohat oldi va neft obyektlarida yong‘inlar yuz berdi. Reuters xabariga ko‘ra, bu olti oydan beri davom etayotgan Yaqin Sharq urushining keskin kengayganini anglatadi.
Yaman poytaxti va bir qator hududlarni nazorat qilayotgan husiylar Saudiya hududining ichkarisida keng ko‘lamli operatsiya o‘tkazganini bildirdi. Ular dronlar va raketalardan foydalangan. Hujumlar Xamis Mushaitdagi harbiy-havo bazasiga, Abha, Yaman chegarasidagi Najran hamda Qizil dengiz bo‘yidagi Jazan shaharlaridagi davlat neft kompaniyasi obyektlariga qaratildi. Jazan yirik neftni qayta ishlash zavodi va elektr stansiyasiga ega port shahri hisoblanadi.
Saudiya rasmiylari obyektlarda yong‘in chiqqanini tasdiqladi va yaralangan 73 kishi orasida ayollar hamda bolalar borligini ma’lum qildi. Bunday ko‘p sonli jabrlanganlar haqidagi xabarlar AQSH va Isroil fevral oyida Eronga qarshi urush boshlaganidan beri Saudiyaga qilingan eng yirik hujumlardan biri bo‘lganini ko‘rsatmoqda.
Husiylar quyuq tutun va portlashlar aks etgan suratlarni tarqatdi. Ularning aytishicha, bular 7-sentyabr kuni sharqroqda joylashgan boshqa chegara hududida urilgan Saudiya yuk mashinalaridir.
8-sentyabrga o‘tar kechasi husiylar nazoratidagi OAV Saudiya samolyotlari Yaman poytaxti Sanadan sharqda joylashgan Jubah tumaniga to‘rtta havo zarbasi berganini xabar qildi.
Avgustdagi bir oylik tinchlikdan keyin Fors ko‘rfazida janglar qayta boshlandi. Eron va AQSH bir-biriga qarata o‘t ochdi. Bu esa dunyoda neft narxini iyul oyidan beri kuzatilmagan darajaga olib chiqdi. Brent markali neft narxi 8-sentyabr kuni 2 foizdan ko‘proqqa oshib, bir barreli 99 dollardan oshdi.
Husiylarning Saudiya janubi-g‘arbiga hujumi Yaqin Sharqning energiya ta’minotini izdan chiqarishi mumkin. Bu holat qamal qilingan Hormuz bo‘g‘ozidan tashqarida ham urushning global iqtisodiy ta’sirini kuchaytirishi ehtimoli bor.
Saudiya Arabistoni o‘n yildan ortiq vaqtdan beri Yamanda husiylarga qarshi kurashayotgan arab koalitsiyasiga boshchilik qilib keladi. Bu urush so‘nggi yillarda tinchigan edi. Ammo sulh buzildi va hozir husiylar Qizil dengiz kirish qismidagi kemalarga tahdid solmoqda.
Xalqaro migratsiya tashkiloti ma’lumotiga ko‘ra, oxirgi uch kun ichida Yaman g‘arbiy sohili bo‘ylab davom etayotgan urush sababli 18 500 dan ortiq kishi uyini tark etib ketgan.
“Koalitsiya bu terrorchi guruhni tiyib qo‘yish uchun barcha zarur operativ choralarni ko‘radi va uning dushmanona harakatlariga qarshi qat’iy javob beradi”, deyiladi Saudiya boshchiligidagi koalitsiya matbuot kotibi polkovnik Turkiy al-Malkiyning X platformasidagi bayonotida.
Husiylar matbuot kotibi Yahyo Sariy esa Ar Riyodni Yamanga havo zarbalari berish orqali urushni keskinlashtirganlikda aybladi va husiylar bunga javob qaytarishini aytdi.