Honda Accord yangi avlodi kross-universalga aylanadi
Honda Accord yangi avlodi yangi form-faktorga ega bölib, krossover elementlari uyğunlaşgan universalga aylanadi, şuningdek, yanada sportça va futuristik qiyofa kasb etadi.
Honda Accord yangi avlodi kross-universalga aylanadi
Yaponiyaning Honda kompaniyasi 2027-yilning ikkinchi yarmida Accord oilasini keng ko‘lamli yangilashni rejalashtirmoqda, deb xabar beradi Automotive News kompaniya rejalaridan xabardor manbalarga tayanib. Model yangi dizayn oladi, modellar qatorida esa universal va krossover uyg‘unligidagi kuzovga ega versiya paydo bo‘ladi.
Keyingi avlod Accord modelining tashqi ko‘rinishi sezilarli darajada o‘zgarishi kutilmoqda: avtomobil hozirgi qiyofasi o‘rniga yanada sportcha va futuristik ko‘rinishga ega bo‘ladi. Taxminlardan biriga ko‘ra, dizaynni ishlab chiqishda Honda avvalroq 0 Series elektromobillar oilasi konseptlarida namoyish etilgan yechimlardan foydalanishi mumkin. Yana bir ehtimoliy manba — kompaniya tomonidan 2026-yil bahorida taqdim etilgan prototipdir.
Salonda ham o‘zgarishlar bo‘lishi kutilmoqda. Xususan, Accord yanada kattaroq displeylar, kengaytirilgan multimedia imkoniyatlari va yaxshilangan bezak materiallariga ega bo‘lishi mumkin.
Shu bilan birga, dastlabki ma’lumotlarga ko‘ra, modelning texnik asosi o‘zgarishsiz qoladi. Avtomobil o‘zining hozirgi platformasini saqlaydi, asosiy o‘zgarishlar esa 1,5 va 2 litr hajmli dvigatelga ega gibrid kuch qurilmalariga taalluqli bo‘ladi. Yoqilg‘i sarfini kamaytirish maqsadida ularni takomillashtirish rejalashtirilmoqda.
Universal va krossover xususiyatlarini o‘zida mujassam etgan alohida yo‘ltanlamas Accord modifikatsiyasi 2029-yilda chiqishi kutilmoqda. Nashr suhbatdoshlarining so‘zlariga ko‘ra, u 2010-yillarning birinchi yarmida ishlab chiqarilgan Honda Accord Crosstour modelining g‘oyaviy davomchisiga aylanishi mumkin.