Hyundai yangi Bayon krossoverini namoyish etdi
Parijdagi avtosalonda Hyundai kompaniyasi oʻzining ixcham Bayon krossoverining yangi avlodini taqdim etdi. Avtomobilning tashqi koʻrinishi jiddiy oʻzgargan boʻlsa-da, texnik va funksional jihatdan inqilobiy yangiliklar yuz bermadi.
Hyundai yangi Bayon krossoverini taqdim etdi
Parij avtosalonida ixcham Hyundai Bayon krossoverining mutlaqo yangilangan talqini debyut qildi.
Janubiy Koreya brendi vakillarining aytishicha, model tashqi ko‘rinish va texnik jihatdan sezilarli darajada modernizatsiya qilingan.
Asosiy yangilik — avtomobilni yo‘lda yanada ko‘zga tashlanadigan qilishga qaratilgan radikal qayta dizayn. Dizaynning asosi sifatida Tucson modelining so‘nggi avlodidan tanish bo‘lgan Art of Steel konsepsiyasi olingan. Bu o‘ziga xos detallarda yaqqol ko‘rinadi: «xokkey klyushkasi» shaklidagi kunduzgi chiroqlar, ko‘tarilgan kapot chizig‘i, g‘ildirak arkalarining katta kengaytirgichlari. Model nomi endi yukxona qopqog‘ida, Hyundai emblemasi ostida yirik harflar bilan yozilgan.
Bayon uchun ilk bor N Line komplektatsiyasi ham taqdim etildi: u 18 dyuymli g‘ildiraklar, qo‘shaloq tutun quvurlari, salonda esa qizil chokli bezaklar va metall pedallarni o‘z ichiga oladi.
Eksteryerdagi o‘zgarishlar tufayli krossover avvalgisiga nisbatan vizual jihatdan kattaroq ko‘rinadi. Kenglik hissi texnik tomondan ham mustahkamlangan: g‘ildiraklar bazasi 20 mm ga uzaytirilib, 2600 mm ga yetkazilgan.
Mavjud opsiyalar orasida 12,3 dyuymli ikkita ekran, doiraviy ko‘rish kameralari, ventilyatsiyali o‘rindiqlar va panoramali tom bor. Shuningdek, Digital Key 2 tizimi (smartfon orqali avtomobilni ochish va ishga tushirish) hamda Bose audiotizimi taklif etiladi. Shu bilan birga, salondagi konsolda an’anaviy fizik tugmalar bloki saqlab qolingan.
Bayon dvigateli 6 bosqichli «mexanik» yoki 7 bosqichli «robot» bilan birga ishlaydigan 89 ot kuchiga ega 1,0 litrli to‘rt silindrli bazaviy T–GDI turbomotordan iborat.
Yangilangan Bayon 2027-yil boshida Yevropadagi Hyundai dilerlariga yetkazib beriladi.