Hokim yordamchilari xalq ichida («Shodlik» mahallasi)

Hokim yordamchilari xalq ichida («Shodlik» mahallasi)

– Oʻzingiz haqingizda qisqacha gapirib bersangiz. Kasbiy yoʻlingiz qanday boshlangan va bu lavozimga qanday kelib qoldingiz?

– Men oʻz faoliyatimni Sirdaryo viloyati Gʻaznachilik boshqarmasida boshlaganman. U yerda davlat moliyasi, byudjet ijrosi va moliyaviy intizom boʻyicha katta tajriba orttirdim. Keyinchalik, mahallalarda yangi tizim — hokim yordamchilari instituti joriy etilgach, aholi bilan bevosita ishlash istagida ushbu lavozimga oʻtdim. Bugungi kunda asosiy maqsadim — mahalladagi har bir oila bilan ishlash, ishsiz fuqarolar bandligini taʼminlash, tadbirkorlikni qoʻllab-quvvatlash va aholi daromadlarini oshirishga amaliy hissa qoʻshishdir. Bu ish katta masʼuliyat talab etadi, ammo odamlarning minnatdorchiligi meni yanada koʻproq mehnat qilishga ilhomlantiradi.

– Mahallaning qiyofasini qanday tasvirlagan boʻlardingiz? Unda kimlar yashaydi va ular daromadlarini qanday topadilar?

– «Shodlik» mahallasi Guliston shahridagi eng faol va jadal rivojlanayotgan mahallalardan biridir. Bu yerda turli kasb egalari, tadbirkorlar, yosh oilalar va mehnat faxriylari istiqomat qiladi. Aholining aksariyat qismi xizmat koʻrsatish sohasi, savdo, kichik biznes, shuningdek, davlat tashkilotlari va xususiy kompaniyalarda mehnat qiladi. Oʻzini oʻzi band qilgan va oilaviy tadbirkorlik bilan shugʻullanuvchi fuqarolar soni yildan-yilga oshib bormoqda.

Mahallada barcha zarur ijtimoiy infratuzilma mavjud. Bu yerda 5 ta tijorat banki, 1 ta davlat taʼlim muassasasi, sogʻliqni saqlash boshqarmasi, 2 ta xususiy taʼlim muassasasi, 1 ta davlat maktabgacha taʼlim tashkiloti, 5 ta xususiy bogʻcha, bir nechta sanoat korxonasi hamda 164 ta savdo va xizmat koʻrsatish shoxobchasi faoliyat yuritmoqda. Yoʻllar va koʻchalarni obodonlashtirish, muhandislik-kommunikatsiya tarmoqlarini modernizatsiya qilish ishlari olib borilmoqda.

Hokim yordamchisi sifatida bizning asosiy vazifamiz — har bir oilaning salohiyatini oʻrganish va ularning daromadlarini oshirishga koʻmaklashishdir. Biz tizimli ravishda fuqarolarni kasb-hunarga oʻqitishga yoʻnaltiramiz, imtiyozli kreditlar va subsidiyalar olishlariga yordam beramiz, tadbirkorlik tashabbuslarini qoʻllab-quvvatlaymiz va boʻsh ish oʻrinlariga joylashishlariga koʻmaklashamiz. Eng muhimi, biz har bir murojaatga individual yondashamiz va odamlarning muammolarini joyida hal qilishga harakat qilamiz.

– Yoʻlingizning boshida siz uchun eng qiyini nima boʻldi va buni qanday yengib oʻtdingiz?

– Hokim yordamchisi sifatida ish boshlagan ilk davrimda eng katta qiyinchilik qisqa vaqt ichida mahalladagi har bir oilaning ahvoli, ehtiyojlari va imkoniyatlarini atroflicha oʻrganish boʻldi. Shu bois ishimizni aholi bilan shaxsiy muloqotdan boshladik — xonadonma-xonadon yurib, ularning fikr-mulohazalarini tingladik. Avvaliga ayrim fuqarolar yangi tizimga unchalik ishonishmadi. Biroq, amaliy natijalarni koʻrsatganimizdan soʻng, odamlarning ishonchi ortdi. Bugungi kunda aholi bizga bemalol murojaat qilmoqda va biz birgalikda yechim topishga harakat qilyapmiz. Mening fikrimcha, hokim yordamchisi uchun eng muhim fazilat — odamlarni tinglay bilish, ular bilan muloqotda boʻlish va har bir masalaga individual yondashishdir. Aynan shu tamoyil ishimiz samaradorligini taʼminlamoqda.

– Oʻtkazilgan tadqiqotlar asosida mahallada qanday iqtisodiy imkoniyatlar aniqlandi?

– Har bir oila bilan muloqot qilish orqali biz mahallaning iqtisodiy salohiyati bilan yaqindan tanishishga muvaffaq boʻldik. Oʻrganishlar shuni koʻrsatdiki, «Shodlik» mahallasida xizmat koʻrsatish sohasi, savdo, oilaviy tadbirkorlik va hunarmandchilikni rivojlantirish uchun keng imkoniyatlar mavjud. Xususan, koʻplab aholi vakillarida tikuvchilik, pazandachilik, maishiy xizmat koʻrsatish, avtoservis va xizmat koʻrsatishning boshqa yoʻnalishlariga qiziqish juda yuqori.

Ayrim fuqarolarda oʻz biznesini boshlash uchun yetarli tajriba va istak bor edi, biroq ularga moliyaviy koʻmak yoki maslahat zarur edi. Biz ularni imtiyozli kreditlash dasturlari, subsidiyalar va kasb-hunarga oʻqitish tizimi bilan bogʻlab, oʻz bizneslarini yoʻlga qoʻyishlariga yordam berdik. Bugungi kunda asosiy maqsadim — har bir xonadon salohiyatini daromad manbaiga aylantirishdir. Zero, mahallaning iqtisodiy rivojlanishi, birinchi navbatda, har bir oilaning barqaror daromadiga bogʻliq.