«Hissiyotlar toʻlqini» - Lindsi Klensi ishi boʻyicha hakamlar hayʼati aʼzolari sud jarayonining muvaffaqiyatsiz yakunlanishiga nima sabab boʻlgani haqida gapirishdi
Uch nafar hakamlar hayʼati aʼzosining soʻzlariga koʻra, 40 soatlik muhokamadan keyin ham bir nafar erkak hakam Klensini ruhiy kasalligi sababli aybsiz deb topish boʻyicha hayʼatning qolgan aʼzolari fikriga qoʻshilishdan bosh tortgan.
**«Hissiyotlar toʻlqini» - Lindsi Klensi ishi boʻyicha hakamlar hayʼati aʼzolari sud jarayonining muvaffaqiyatsiz yakunlanishiga nima sabab boʻlgani haqida gapirishdi**
Lindsi Klensi sudidagi hakamlar hayʼati aʼzolari shov-shuvli ishning muvaffaqiyatsiz yakunlanishidan oldin boʻlib oʻtgan yopiq muhokamalar va boshi berk koʻchaga kirib qolish holati haqida ilk bor ommaviy ravishda gapirishdi.
Uch nafar ayol hakam — jumladan, hayʼat raisi — NBC telekanaliga bergan intervyusida, hayʼat Klensini uch farzandini oʻldirganlikda ruhiy kasalligi sababli aybdor emas deb topish haqida hukm chiqarishga tayyor boʻlganini, biroq bir nafar hakam bunga rozi boʻlishdan bosh tortganini maʼlum qildi.
Hayʼat raisining soʻzlariga koʻra, erkak hakam ayolning jinoiy javobgarligi borasida «asosli shubhalari borligini tan olgan», lekin baribir aybsizlik haqidagi hukmni qabul qilmagan.
Klensi qotilliklarni sodir etganini inkor etmagan, biroq uning advokatlari u tugʻruqdan keyingi psixozdan aziyat chekkanini taʼkidlashgan. Prokurorlar esa uning bu ishni ongli ravishda amalga oshirganini aytishgan.
Hakamlar hayʼatidagi toʻqqiz ayol va uch erkakning ism-shariflari oshkor etilmagan va sudya ularning anonimligini himoya qilish maqsadida sud jarayonida ularni suratga olish yoki videoga olishni taqiqlagan edi.
Biroq, AQShda ish yakunlanganidan keyin, istalgan hakam ish va muhokamalar haqida ommaviy ravishda gapirish-gapirmaslikni oʻzi hal qilishi mumkin. Klensining ishi kabi yirik sud jarayonlaridan keyin hakamlar koʻpincha shunday qilishadi — hatto baʼzilari kitob ham yozishadi.
Sud jarayonida ishtirok etgan BBC teleradiokompaniyasi NBC bilan suhbatlashgan uch ayol haqiqatan ham hakamlar hayʼati aʼzolari boʻlganini tasdiqladi.
Seshanba kuni efirga uzatilgan NBC intervyusida hayʼat raisi — nafaqadagi beshinchi sinf oʻqituvchisi — bir qarorga kela olmaganini «daxshatli» va «hissiyotlar toʻlqini» (emotional roller coaster) deb taʼrifladi.
Uning soʻzlariga koʻra, muhokamalar juda ogʻir kechgan, «koʻp yigʻi-sigʻi» va «koʻp koʻz yoshlari, soʻngra esa quchoqlashishlar» bilan oʻtgan.
«Men juda xafa boʻldim, Lindsi uchun bir qarorga kela olmaganimizdan juda qattiq qaygʻurdim. Bu juda alamli edi», — deya qoʻshimcha qildi u.
Intervyu davomida uch ayol hakamlar hayʼati deyarli bir ovozdan hukm chiqarish tarafdori boʻlganini, biroq fikrida qatʼiy turgan yagona hakam oʻz pozitsiyasini oʻzgartirmaganini taʼkidladi.
Hayʼat raisining aytishicha, oʻsha yagona hakam «oʻzida asosli shubha borligini tan olganidan keyin, men katta hayajon bilan blankalarni toʻldirishni boshladim».
U hukm blankalarini toʻldirishni yarmiga yetkazganida, oʻzi erkak kishi deb koʻrsatgan oʻsha hakam soʻzida davom etgan: «Lekin men baribir uni ruhiy kasalligi sababli aybdor emas deb aytmayman», — degan u hayʼatga.
Ushbu erkak hali omma oldiga chiqmadi va bu bayonotlarga munosabat bildirmadi.
Uch nafar hakamning aytishicha, ularning muhokamalari bahs-munozaralar va baqir-chaqirlarga sabab boʻlgan, bu tovushlar baʼzan devor ortidan ham eshitilib turgan.
Massachusets shtati qonunchiligiga koʻra, Klensi oʻzining ruhiy kasalligini yoki jinoiy javobgarlikka tortilmasligi kerakligini isbotlashi shart emas edi. Buning oʻrniga, ayblov tomoni u bolalarini oʻldirgan vaqtda jinoiy javobgarlikka tortilish darajasida sogʻlom boʻlganini hech qanday asosli shubhasiz isbotlashi kerak edi, deb tushuntirgan edi avvalroq jinoiy himoya boʻyicha advokat Eliz Xershon BBC'ga.
«Biz uning bolalarini oʻldirgan-oʻldirmaganini aniqlashga harakat qilmayotgan edik. U buni qilgan va buni tan olgan», — dedi hayʼat raisi NBC intervyusida. «Biz oʻsha paytda u yaxshini yomondan ajrata olganmi-yoʻqmi — shuni aniqlashga harakat qilayotgan edik».
Uch nafar hakam ayblov tomonining dalillari ularni ishontira olmaganini aytdi.
«Hamma narsa uning bolalarini yaxshi koʻrganini isbotladi, demak, u ruhiy muvozanatni yoʻqotgan va nima qilayotganini bilmagan», — dedi hayʼat raisi.
Hukumatning mudofaa pudratchisi boʻlib ishlaydigan boshqa bir hakamning aytishicha, fikrida qatʼiy turgan hakam Klensining qanday dorilar qabul qilganidan xavotirda boʻlgan.
«Bizda toksikologik hisobotlar bor edi. Biz miqdorlarni aniq koʻra oldik», — dedi u va hakamlar hayʼati tarkibidagi hamshiralar bu masalani muhokama qilishganini qoʻshimcha qildi. «U esa ular bergan maʼlumotlarni shunchaki butunlay inkor etdi», — deya qoʻshimcha qildi hakam.
Qariyalar uyida oshpaz boʻlib ishlaydigan uchinchi hakam prokurorlarni «juda, juda shafqatsiz» deb topganini aytdi va shunday qoʻshimcha qildi: «Ularda Lindsining yomon ona boʻlgani haqida birorta ham guvoh yoʻq edi».
Sud jarayonida prokurorlar Klensi Massachusetsdagi uyining yertoʻlasida bolalarini oʻldirish haqida puxta oʻylangan qaror qabul qilganini koʻrsatish maqsadida oʻnlab guvohlarni, jumladan, bir nechta shifokorlarni chaqirishdi.
Hakamlar hayʼati Klensining taqdirini hal qilish uchun yetti kun davomida qariyb 40 soat muhokama oʻtkazgani sababli ish dramatik tus oldi. Hayʼat bir necha bor boshi berk koʻchaga kirib qolganini bildirdi — va bir vaziyatda sudyaga hakamlardan biri sudyaning asosli shubha boʻyicha koʻrsatmalariga amal qilmayotganini aytdi.
Bu Klensining himoyachisini oʻsha hakamni hayʼatdan chetlatishni soʻrashga majbur qildi — bu iltimos tezda rad etildi — shundan soʻng hakamlar hayʼati yana bir ovozdan qarorga kela olmasligini maʼlum qildi.
Shundan soʻng, juma kuni sudya Uilyam Sallivan sud jarayonini muvaffaqiyatsiz deb eʼlon qildi.
Bu qaror ish va Klensining kelajagini nomaʼlumligicha qoldirmoqda, chunki prokurorlar ishni yangi hakamlar hayʼati bilan qayta koʻrib chiqish-chiqmaslikni hal qilishlari kerak.
Klensining advokati Kevin Reddington oʻshandan beri ish ikkinchi sud jarayonigacha bormasligi uchun prokurorlar bilan kelishuvga erishishga umid qilayotganini aytdi.
Uch nafar hakam NBC telekanaliga boshqa sud jarayoni boʻlmasligiga umid qilishlarini bildirishdi — lekin agar u boʻlib oʻtsa, uchovi ham Klensini qoʻllab-quvvatlash uchun unda ishtirok etishni rejalashtirayotganini aytishdi.