Haydovchilik imtihonini kutish vaqti ikki yillik eng past darajaga tushdi - lekin hali ham oʻrtacha 20 haftani tashkil etmoqda
Sentyabr oyida haydovchilikka oʻrganuvchilar amaliy imtihon topshirish uchun oʻrtacha 19,7 hafta, yaʼni taxminan besh oy kutishlariga toʻgʻri keldi.
Haydovchilik imtihonini kutish vaqti oxirgi ikki yildagi eng past darajaga tushdi, biroq u hali ham oʻrtacha 20 haftani tashkil etmoqda
Rasmiy maʼlumotlarga koʻra, haydovchilik imtihonlarini kutish vaqti 2024 yilning noyabr oyidan beri birinchi marta 20 haftadan pastga tushdi.
Shunga qaramay, sentyabr oyida oʻrganuvchi haydovchilar amaliy imtihon topshirish uchun hali ham oʻrtacha 19,7 hafta, yaʼni besh oyga yaqin kutishgan.
Haydovchilar va transport vositalari standartlari agentligi (DVSA) ushlanib qolishlarni kamaytirish va 2020 yildagi Kovid pandemiyasi davrida yuzaga kelgan navbatlarni bartaraf etish ustida ishlamoqda.
Bir haydovchilik oʻrgatuvchisi agentlikning erishgan yutuqlariga javoban BBC ga shunday dedi: "Menimcha, bu maqtansa arziydigan narsa emas."
DVSA dastlab oʻtgan yilning oxirigacha oʻrtacha kutish vaqtini yetti haftagacha kamaytirishni maqsad qilgan edi.
Transport vaziri Haydi Aleksander keyinchalik bu muddatni 2026 yilning yoziga surdi, ammo keyinchalik bunga ham erishib boʻlmasligini, endilikda kutish vaqti kelasi kuzgacha yetti haftaga tushishi kutilmayotganini aytdi
Sentyabr oyida DVSA 191 682 ta amaliy haydovchilik imtihonini oʻtkazdi va ularning yarmidan koʻpi muvaffaqiyatli topshirildi.
Oʻrganuvchi haydovchilar BBC ga haydovchilik imtihonlariga kirishning cheklangani ularning erkinligi, taʼlimi va ish imkoniyatlarini cheklab qoʻyganini bir necha bor taʼkidlashgan.
Shu yilning boshigacha koʻplab oʻrganuvchi haydovchilar imtihon joylarini oʻrganuvchilar band qilishidan oldin avtamatlashtirilgan dasturlar yoki botlardan foydalanib, ommaviy ravishda band qilib olgan va qayta sotuvchi uchinchi tomon provayderlaridan oshirilgan narxlarda sotib olishgan.
DVSA joriy yil boshida imtihonlarni band qilish tizimidan suiisteʼmol qilinishining oldini olish uchun bir qancha oʻzgartirishlar kiritdi. Endilikda faqat oʻrganuvchi haydovchining oʻzigina haydovchilik imtihonini band qila oladi.
Uotfordlik haydovchilik oʻrgatuvchisi Sofi Stachfild ilgari BBC ga xabar almashish guruhlarida qayta sotuvchilar tomonidan sotga qoʻyilgan yuzlab haydovchilik imtihonlarini koʻrsatgan edi
Uotfordlik haydovchilik oʻrgatuvchisi Sofi Stachfild BBC ga shunday dedi: "Imtihonlarni qayta sotish toʻxtatilganga oʻxshaydi va bu juda ijobiy holat boʻlsa-da, ular hali ham talabni qondirish uchun yetarlicha imtihon oluvchilarni ishga qabul qila olishmadi."
Uning aytishicha, kutish vaqtining bir oz kamayishi "maqtansa arziydigan narsa" emas va koʻp joylarda imtihonni band qilishdagi kutish vaqti 21 haftani tashkil etmoqda.
"Koʻp hollarda, mening haydovchilarim dushanba kuni 5:45 da uygʻonishadi, ammo baribir imtihonsiz qolishadi, chunki ular biror narsani bosib, oʻz maʼlumotlarini kiritguncha, imtihon allaqachon band qilingani aytiladi."
Sofining qoʻshimcha qilishicha, imtihonni kutish vaqti uzoqligi sababli "hatto haydovchilik saboqlarini boshlamagan" koʻplab oʻrganuvchi haydovchilar "imtihonga 5 oy borligini bilib, uni oldindan band qilib qoʻyishadi", bu esa oʻzlarini va oʻrgatuvchini katta bosim ostiga qoʻyadi.
Avtomobil yoʻllari vaziri Jastin Maddersning aytishicha, hukumat "rekord darajadagi kutish vaqtlari va katta hajmdagi navbatlarni meros qilib olgan".
"Haydovchilik imtihonini kutish vaqti hali biz xohlagan darajada boʻlmasa-da, ushbu raqamlar haqiqiy ilgarilash borligini koʻrsatmoqda", deya qoʻshimcha qildi u.
DVSA vakili agentlik "kutish vaqtlarini kamaytirishga sodiq" ekanini va "imtihon oluvchilar soni 2017 yilning noyabridan beri eng yuqori darajada" ekanini aytdi.
"Biz hali qilinadigan ishlar koʻpligini bilamiz va har bir oʻrganuvchi haydovchilikni qayerda oʻrganayotganidan qatʼi nazar, kerak boʻlganda imtihon joyini olmagunicha toʻxtamaymiz", deya qoʻshimcha qildi vakil.