GTA sobiq dasturchisining studiyasi debyut oʻyini muvaffaqiyatsizlikka uchraganidan keyin yopilish xavfi ostida qoldi

Sobiq GTA dasturchisining studiyasi debyut oʻyini muvaffaqiyatsizlikka uchraganidan keyin yopilish arafasida turibdi

2025 yil iyun oyida chiqarilgan MindsEye oʻyini Build A Rocket Boy studiyasining debyut oʻyini edi

Grand Theft Auto oʻyinining sobiq yetakchi dasturchisi tomonidan asos solingan videooʻyinlar studiyasi oʻz birinchi oʻyinining halokatli chiqarilishidan 15 oy oʻtib, yopilish xavfi ostida qoldi.

Edinburgda joylashgan Build A Rocket Boy (Barb) studiyasi 2025 yil iyun oyida MindsEye oʻyinini taqdim etdi va u koʻplab salbiy taqrizlar hamda oʻyinchilarning noroziliklariga duch keldi, baʼzilar uni yilning «eng yomon oʻyini» deb atashdi.

Sobiq xodimlarning aytishicha, oʻyinni yaratish jarayoni tartibsiz boʻlgan va ular studiya rahbari Lesli Benzisni kompaniyani notoʻgʻri boshqarishda ayblashdi.

Shundan soʻng Barb tashqi boshqaruv (bankrotlik) jarayoniga kirdi, bu jarayon biznesning yangi egasiga sotilishiga yoki butunlay yopilishiga olib kelishi mumkin.

Benzis Barb studiyasiga 2016 yilda, toʻlanmagan royaltilar boʻyicha sudlashuvdan soʻng Grand Theft Auto yaratuvchisi boʻlmish Rockstar Games kompaniyasini tark etgan yili asos solgan edi.

Studiya dastlab futuristik shaharda boʻlib oʻtadigan koʻp foydalanuvchili rolli oʻyin boʻlishi rejalashtirilgan Everywhere loyihasi ustida ishladi, keyinchalik esa eʼtiborini MindsEye jangari-sarguzasht oʻyiniga qaratdi.

Sobiq xodimlar bundan avval BBC Newsbeat nashriga ishlab chiqish jarayonida «aniq yoʻnalish boʻlmaganini» va rahbariyat ularning xavotirlariga eʼtibor bermaganini aytishgan edi.

Oʻyinning muvaffaqiyatsiz chiqarilishidan soʻng, 250 dan 300 gacha xodim qisqartirildi.

Bundan sal oldin, barcha xodimlar ishtirokidagi yigʻilishda Benzis «ichki va tashqi» kuchlar MindsEye oʻyinining chiqarilishiga toʻsqinlik qilish uchun birgalikda harakat qilganini daʼvo qildi va kompaniya ichidagi «diversantlarni» aniqlashga vaʼda berdi.

Newsbeat bu masala boʻyicha Barb kompaniyasiga murojaat qilganda, kompaniya quyidagicha bayonot berdi: «Lesli va butun rahbariyat [MindsEye oʻyinining] dastlabki chiqarilishi uchun toʻliq javobgarlikni oʻz zimmasiga oladi.

Oʻyinning taqdim etilgan versiyasi hamjamiyatimiz loyiq boʻlgan tajribani aks ettirmadi».

Oʻyin chiqarilganidan beri, bir qator tuzatishlar va yangilanishlarga qaramay, kompaniya oʻyinga kattaroq auditoriyani jalb qila olmadi.

Qoʻshimcha qisqartirishlardan soʻng, oʻtgan haftadagi xabarlarga koʻra, studiyaning qolgan xodimlari ham ishdan boʻshatilgan.

Barb kompaniyasining 2025 yil sentyabrigacha boʻlgan davrni qamrab oluvchi soʻnggi moliyaviy hisobotlari 36,2 million funt sterling zarar va 10,5 million funt sterling sof aktivlarni koʻrsatmoqda.

Grand Theft Auto uni afsonaga aylantirgan edi. Uning soʻnggi oʻyini esa halokat bilan yakunlandi