ChatGPT ayolning ehtimoliy qotilligini oldini olishga yordam berdi
Amerikada OpenAI kompaniyasi xavfsizlik tizimi huquq-tartibot idoralariga ayol kishiga nisbatan qotillik jinoyatining oldini olishda koʻmaklashdi.
ChatGPT ayolning ehtimoliy qotilligining oldini olishga yordam berdi.
OAV xabarlariga koʻra, Goldman Sachs kompaniyasining 25 yoshli xodimi Darren Shida Chjou sobiq sevgilisini oʻgʻirlash, zoʻrlash va oʻldirishni rejalashtirish uchun ChatGPT bilan maslahatlashgan. U jinoyatni sodir etgach, oʻz joniga qasd qilishni ham rejalashtirgan.
OpenAI kompaniyasining xavfsizlik tizimi ushbu yozishmani avtomatik ravishda ehtimoliy xavfli deb topgan. Shundan soʻng, uni OpenAI mutaxassislari tekshirgan va aynan ular maʼlumotni huquq-tartibot idoralariga topshirishga qaror qilgan. ChatGPT oʻzi mustaqil ravishda politsiyaga jinoyat haqida xabar bermagan.
Maʼlumotni olgach, FQB va mahalliy huquq-tartibot idoralari tergov ishlarini boshladi. Yakunda Chjou hibsga olindi.
Tergov, shuningdek, erkak ayriliqdan soʻng turli telefon raqamlari va akkauntlardan foydalanib, sobiq sevgilisini bir necha bor taʼqib qilganini ham aniqladi.
Chjou uchta jinoiy ayblov boʻyicha oʻz aybiga iqror boʻldi: qotillik yoki ogʻir tan jarohati yetkazish bilan tahdid qilish; jiddiy tahdid bilan taʼqib etish; jinoyat sodir etish maqsadida aloqa vositasidan noqonuniy foydalanish.
Sudya jinoyat ishi boʻyicha rasmiy hukm chiqarmasdan, unga 8 yillik probatsiya (sinov muddati) tayinladi.
Bu voqea sunʼiy intellekt tizimlaridan zoʻravonlik xavfini barvaqt aniqlashda qanday foydalanish mumkinligiga misollardan biri boʻldi. Shu bilan birga, u foydalanuvchilarning sunʼiy intellekt bilan yozishmalarining maxfiylik chegaralari masalasini yana bir bor kun tartibiga olib chiqdi.