Glyukozadan oldin berilgan zaytun moyi diabetda samara koʻrsatdi
Kioto universiteti olimlari sichqonlarga glyukozadan 15 daqiqa oldin zaytun moyi berilganda, qondagi qandning keskin koʻtarilishi kamayishini aniqladi. Taʼsir ikkinchi tur diabeti va kuchli insulin tanqisligi boʻlgan sichqonlarda ham kuzatilgan. Natijani insonlarda tasdiqlash uchun klinik tadqiqotlar zarur.
Glyukozadan oldin berilgan zaytun moyi diabetda samara koʻrsatdi
Yaponiyalik tadqiqotchilar mahsulotlarni qaysi tartibda isteʼmol qilish organizmning glyukozaga javobini qanday oʻzgartirishini oʻrgangan.
Tajriba davomida bir guruh sichqonga avval zaytun moyi, 15 daqiqadan soʻng glyukoza berilgan. Ikkinchi guruhda esa bu ketma-ketlik aksincha boʻlgan.
Olimlar yogʻning oldin berilishi oshqozonning boʻshash jarayonini sekinlashtirishini aniqlagan. Shu sabab glyukoza ingichka ichakka asta-sekin oʻtgan va qondagi qand darajasi keskin oshmagan.
Tahlillar bu taʼsir faqat ovqatning oshqozonda uzoqroq qolishi bilan cheklanmasligini koʻrsatgan. Zaytun moyi ichakdagi GLP-1 va GIP gormonlari ajralishini kuchaytirgan, shuningdek, bosh miyani hazm aʼzolari bilan bogʻlovchi adashgan nervning signal yoʻllarini faollashtirgan.
Tadqiqotda glyukagon gormonining roli ham diqqatga sazovor boʻlgan. Odatda qondagi qandni oshirish bilan bogʻliq bu gormon mazkur tajriba sharoitida GLP-1 bilan birga glyukozaning keskin koʻtarilishini cheklashga yordam bergan.
Mualliflarga koʻra, aniqlangan mexanizm mahsulotlarni isteʼmol qilish ketma-ketligi qand darajasiga qanday taʼsir qilishini tushunishga yordam beradi.
Biroq sichqonlarda kuzatilgan natija odamlarda ham aynan shunday samara berishini anglatmaydi. Insonlar uchun taʼsir darajasi, maqbul miqdor va xavfsizlikni baholashga qaratilgan klinik sinovlar hali oʻtkazilishi kerak. Shu bois bu ish zaytun moyini diabet davosi yoki dorilar oʻrnini bosuvchi vosita sifatida tavsiya qilish uchun asos boʻla olmaydi.