Gaiti prezident suiqasdida gumon qilinayotgan 18 kishini AQShga ekstraditsiya qildi
Gumonlanuvchilar bundan besh yil avval Gaiti prezidenti Jovenel Moizning oʻldirilishi boʻyicha sud jarayonida ishtirok etish uchun Mayamiga uchib ketishdi.
**Gaiti prezident suiqasdida gumon qilinayotgan 18 nafar shaxsni AQShga ekstraditsiya qildi**
Gaiti prezidenti Jovenel Moiz oʻldirilganidan beri mamlakatda toʻdalar zoʻravonligi avj oldi.
Bundan besh yil avval Gaiti prezidenti Jovenel Moizning oʻldirilishida gumon qilinayotgan 18 kishi sud jarayonida ishtirok etishi uchun Gaitidan AQShning Florida shtatiga olib ketildi.
Moiz 2021 yil iyul oyida poytaxt Port-o-Prensdagi uyida, taxminlarga koʻra, asosan kolumbiyalik yollanma askarlardan iborat guruh tomonidan otib oʻldirilgan edi.
Gaitida qotillik boʻyicha olib borilgan avvalgi tergovlarga mamlakat boʻylab toʻdalarning keng tarqalgan nazorati va qonunsizlik toʻsqinlik qilgan.
Ekstraditsiya prezident suiqasdi uchun «javobgarlikka tortish yoʻlidagi navbatdagi muhim bosqichdir», deb yozdi AQShning Florida janubiy okrugi prokurori Jeyson Reding Kinones X ijtimoiy tarmogʻidagi postida.
«Besh yil oʻtsa ham, biz hali hanuz ayblanuvchilarni Amerika sudlariga olib kelmoqdamiz va bu ish hali tugagani yoʻq», dedi Kinones X tarmogʻida.
Uning soʻzlariga koʻra, qotillik munosabati bilan hozirgacha 30 nafar gumonlanuvchiga nisbatan ayblov eʼlon qilingan.
AQSh prokurorlarining taʼkidlashicha, Moiz qotilligini rejalashtirish va moliyalashtirish Florida, shuningdek, Dominikan Respublikasi va Gaitining oʻzidan turib muvofiqlashtirilgan.
Gaiti adliya tizimi juda ayanchli ahvolda boʻlgani sababli, AQSh prokurorlari ishlarni oʻsha yerda koʻrib chiqish uchun hibsga olinganlarni Floridaga olib ketishga majbur boʻlishdi.
Qurollangan shaxslar Moizning qarorgohiga bostirib kirib, uni yotoqxonasida oʻldirishganida, bu Karib havzasi davlatini larzaga soldi.
Koʻplab gaitiliklar 53 yoshli prezidentning bunchalik osonlik bilan oʻldirilganidan hayratda qolishdi.
Yakshanba kuni ekstraditsiya qilinganlar orasida 17 nafar kolumbiyalik sobiq askar va oʻsha paytdagi Gaiti hukumatining yuqori lavozimli mulozimi, mamlakat adliya vazirligining korruptsiyaga qarshi kurashish boʻlimida ishlagan Jozef Badio bor edi.
Mayamida joylashgan xavfsizlik firmasi kolumbiyalik sobiq askarlarni yollashda asosiy rol oʻynaganlikda ayblanmoqda.
«Bugungi turli joylardagi va xalqaro hibsga olishlar FQBning ushbu fitnaning barcha ishtirokchilarini javobgarlikka tortish borasidagi qatʼiy intilishini yana bir bor tasdiqlaydi», dedi FQB maxsus agenti Brett Skils X tarmogʻida.
Qotillikka aloqadorlikda gumon qilingan bir necha kishi oʻsha paytda politsiya tomonidan otib oʻldirilgan edi.
May oyida Mayami sudi tomonidan toʻrt kishi fitnadagi ishtiroki uchun aybdor deb topildi, prokurorlar uzoq vaqt davomida bu fitna Mayamida, shuningdek, Dominikan Respublikasida rejalashtirilgan va moliyalashtirilgan deb kelishgan.
Ayblovlari Moizni oʻldirish yoki oʻgʻirlab ketish uchun fitna uyushtirish va qotillik bilan bogʻliq moddiy yordam koʻrsatish uchun fitna uyushtirishni oʻz ichiga olgan ushbu shaxslar umrbod qamoq jazosiga hukm qilinishi mumkin.
Kolumbiyalik sobiq askarlar oʻzlarini davlat toʻntarishida ishtirok etayapmiz deb oʻylagan yollanma askarlar boʻlganliklarini va Moizning oʻldirilishidan xabarlari boʻlmaganini aytishgan.
Moiz oʻldirilganidan beri Gaiti toʻdalar zoʻravonligi girdobida qoldi.
BMTning Gaitidagi integratsiyalashgan vakolatxonasi maʼlumotlariga koʻra, joriy yilning aprelidan iyunigacha kamida 1408 kishi halok boʻlgan va 656 kishi yaralangan.
Agar xavfsizlik vaziyati yoʻl qoʻysa, mamlakatda 13 dekabr kuni 2016 yildan beri ilk bor prezidentlik va parlament saylovlari oʻtkazilishi rejalashtirilgan.