Gʻarb elchixonalari Kiyevdan koʻchish rejasini tayyorlamoqda - The Guardian
Rossiyaning Kiyevga zarbalari kuchayishi ortidan Gʻarb davlatlari elchixonalarini Lviv yoki Polshaga koʻchirish rejasini ishlab chiqmoqda. The Guardian bu haqda yuqori martabali ikki diplomatga tayanib xabar berdi. Ayni paytda diplomatlar ochiq bayonotlarida Ukraina poytaxtida qolish niyatini bildirmoqda.
Gʻarb elchixonalari Kiyevdan koʻchirish rejasini tayyorlamoqda — The Guardian
DW maʼlumotiga ko‘ra, Britaniyaning The Guardian gazetasi 2-oktabr kuni so‘nggi kunlarda Kiyevga hujumlar kuchaygani sababli diplomatik vakolatxonalarni boshqa joyga ko‘chirish bo‘yicha rejalar tayyorlanayotganini yozgan.
«Rossiya Kiyevni muzlatib, uni tosh davriga qaytarishni rejalashtirmoqda. Vaziyat, shubhasiz, tez yomonlashyapti», — degan nashr suhbatlashgan diplomatlardan biri.
Xabarda elchixonalar allaqachon ko‘chirilgani haqida emas, balki ehtimoliy ko‘chishga tayyorgarlik haqida so‘z bormoqda.
The Guardian yozishicha, Gʻarb diplomatlari ommaviy bayonotlarida Kiyevda ishlashni davom ettirish niyatini taʼkidlamoqda.
Ular elchixonalarning poytaxtni tark etishi Moskva uchun targ‘ibot g‘alabasiga aylanishi va Ukraina «o‘z holiga tashlab qo‘yilgani» degan taassurot uyg‘otishidan xavotirda.
Shu bois diplomatik vakolatxonalar xavfsizligi masalasi Ukrainaga siyosiy qo‘llab-quvvatlashni namoyish etish zarurati bilan birga ko‘rib chiqilmoqda.
Xabarda qayd etilishicha, sentabrdan boshlab Rossiya qo‘shinlari Kiyevga dron va raketalar bilan hujumlarni kuchaytirgan. Zarbalar maktablar, shifoxonalar va maʼlumotlarni qayta ishlash markazlariga ham tegkan.
Ukraina prezidenti Volodimir Zelenskiy Financial Timesʼga bergan intervyusida Kreml havo hujumlari orqali tinch aholini qo‘rqitish, odamlarni shaharlardan ketishga majburlash va mamlakatning urushni davom ettirish imkoniyatlarini zaiflashtirishni ko‘zlayotganini aytgan.
Uning so‘zlariga ko‘ra, asosiy nishonlar Kiyev, Xarkiv va Odessa hisoblanadi.
Razvedka maʼlumotlaridan xabardor Ukraina va Yevropa xavfsizlik idoralari vakillari Rossiya rejalarida Lviv ham borligini bildirgan. Polsha chegarasi yaqinidagi bu shahar muhim logistika markazi sanaladi.
The New York Times 2-oktabrda Kiyev Rossiyaning Ukrainaning yirik shaharlarini qishda elektr energiyasi, issiqlik va suv taʼminotidan uzishga oid rejalarini qo‘lga kiritgani haqida xabar bergan.