Frontdagi vaziyat. Rossiya Dobropilya olinganini aytmoqda
Aslida şaharni kim nazorat qilmoqda va frontning boşqa uçastkalaridagi vaziyat qanday?
Frontdagi holat. Rossiya Dobropilya egallanganini bildirmoqda
Rossiya bosh shtabi boshlig‘i Valeriy Gerasimov 16-oktabr kuni prezident Vladimir Putinga hisobot berish chog‘ida yana bir bor Rossiya armiyasining frontdagi muhim «muvaffaqiyatlari» haqida, xususan, Dobropilya egallangani va Rossiya qo‘shinlari tez sur’atda oldinga siljiyotgani haqida gapirdi. Biroq, Kupyansk yoki Svyatogorsk egallangani haqidagi avvalgi bayonotlarda bo‘lgani kabi, Rossiyaning bu safargi hisoboti ham haqiqatdan yiroq.
Gerasimovning so‘zlariga ko‘ra, 1-sentabrdan buyon Rossiya armiyasi Ukraina hududining 1,8 ming km kv qismi va 92 ta aholi yashash manzilini egallab olgan. Bunday hududlar qatorida Ukraina qurolli kuchlarining Dobropilya (Donetsk oblasti) va Velikomixaylovka (Dnipropetrovsk oblasti) kabi muhim istehkomlari ham sanalgan.
Zaporijjya oblastida esa rossiyalik harbiylar Malokaterinovka qishlog‘ini egallab, oblast markaziga 5 km masofagacha yaqinlashgani ma’lum qilingan. Sumi oblastida, Rossiya bosh shtabi ta’kidlashicha, Sadki qishlog‘i yaqinida Ukraina qo‘shinlari guruhi tor-mor etilgan, Xarkiv oblasti shimoli-sharqida esa Ukraina qurolli kuchlarining 2 ming jangchisi bo‘lgan «kotyol» yo‘q qilingan.
Rossiya hukumati frontdagi muvaffaqiyatlar haqidagi bayonotlarni tasdiqlovchi foto yoki videoyozuvlar taqdim etmagan.
O‘z navbatida, Ukraina dushman qo‘shinlari sezilarli darajada oldinga siljigani haqidagi xabarlarni nafaqat rad etgan, balki jang maydonidagi vaziyat buning mutlaqo aksi ekanini ta’kidlagan.
«Bu yilgi tendensiya saqlanib qolmoqda: kuz boshidan beri harbiylarimiz ruslar bosib olishga muvaffaq bo‘lganidan ko‘ra ko‘proq hududni ozod qildi. Yilning boshqa davrlarida ham shunday bo‘lgandi», – dedi prezident Volodimir Zelenskiy 18-oktabr kuni.
Donetsk oblasti g‘arbidagi so‘nggi va nisbatan yaxshi himoyalangan aholi yashash manzili hisoblangan Dobropilya shahri atrofdagi Pokrovsk va Mirnograd shaharlari qulaganidan keyin 2026-yil bahorida Rossiya armiyasining asosiy nishoniga aylangandi.
Frontning mazkur uchastkasiga qariyb 100 ming kishilik guruhni jamlagan Rossiya armiyasi shaharni qurshab olish uchun shimol va janubda oldinga harakatlanmoqda.