Frantsiyada 100 dan ortiq shaharlarda ommaviy namoyishlar davom etmoqda
Frantsiyada 100 dan ortiq shaharda ommaviy namoyishlar davom etmoqda. Vazirlik maʼlumotlariga koʻra, shanba kungi yurishlarda butun mamlakat boʻylab 410 ming kishi, shu jumladan Parijda 110 ming kishi ishtirok etdi, shu bilan birga poytaxtdagi vaziyat umuman olganda tinch deb baholandi. Bu orada norozilik chiqishlari tashkilotchilaridan biri boʻlgan CGT kasaba uyushmasi oʻz raqamlarini taqdim etdi: uning hisob-kitoblariga koʻra, koʻchalarga 800 ming namoyishchi chiqqan, shu jumladan Parijda 250 ming kishi.
Bir qator shaharlarda mahalliy hokimiyat organlari tartibsizliklar va vayrongarchiliklar xavfi tufayli namoyishlar oʻtkazishni taqiqladi. Jumladan, yurishlar taqiqlangan Lionda politsiya 150 ga yaqin faollardan iborat guruhni tarqatish uchun koʻzni yoshlatuvchi gazni qoʻllashga majbur boʻldi. Shu bilan birga, Parijda hokimiyat bilan kelishilgan aktsiya odatiy rejimda oʻtmoqda: unda soʻllarning "Boʻysunmas Frantsiya" partiyasi aʼzolari, jumladan prezidentlikka nomzod Jan-Lyuk Melanshon ishtirok etmoqda.
Bundan tashqari, soʻnggi kunlarda Yevropaning bir nechta mamlakatlarida politsiya bilan toʻqnashuvlar, vayrongarchiliklar va yuzlab hibsga olishlar bilan kechgan ommaviy norozilik namoyishlari boʻlib oʻtdi. Yashash qiymatining oshishi, ijtimoiy xarajatlarning qisqartirilishi, korruptsiya mojarolari va maktab formasiga qoʻyiladigan talablar namoyishlar uchun bahona boʻldi.