Frantsiya qishlogʻida oʻgʻlining oʻqituvchisini oʻldirish bilan tahdid qilgan erkak qamoqqa olindi
Ota Tuluza yaqinidagi boshlangʻich maktabning ayol oʻqituvchisini boshini kesish bilan tahdid qilgan edi.
Frantsiya qishlogʻida oʻgʻlining oʻqituvchisini oʻldirish bilan tahdid qilgan erkak qamoqqa olindi
Frantsiyada boshlangʻich maktabda oʻgʻliga tanbeh bergan ayol oʻqituvchini oʻldirish bilan tahdid qilgan erkak olti oylik qamoq jazosiga hukm qilindi.
U payshanba kuni, Tuluza janubi-gʻarbiy shahri yaqinidagi taxminan 2600 aholisi boʻlgan Le-Foga qishlogʻida sodir boʻlgan voqeadan olti kun oʻtib, tezlashtirilgan sud majlisida aybdor deb topildi.
Oʻqituvchi rasmiy himoya ostiga olingan va kasallik taʼtiliga chiqqan.
Frantsiya taʼlim vaziri Eduar Jeffre shunday dedi: "Hech bir oʻqituvchi oʻz vazifasini bajarishdan qoʻrqmasligi kerak. Ulardan biriga hujum qilish — butun tizimga hujum qilish demakdir".
Yoz faslida Jeffre oʻquvchining oila aʼzolari tomonidan xodimlarning xavfsizligi yoki sogʻligʻiga tahdid soluvchi "jiddiy xavf"dan ularni himoya qilishga qaratilgan qonunni qabul qilinishiga erishgan edi.
Vazirning soʻzlariga koʻra, ushbu holat mazkur farmon kuchga kiradigan dastlabki holatlardan biri boʻladi.
Bu voqea Frantsiyada bundan olti yil avval Parij chekkasidagi Konflan-Sent-Onorin shahrida oʻqituvchining boshi kesib ketilgani bilan bogʻliq ogʻriqli xotiralarni yodga soladi. Samuel Pati oʻz maktabi yaqinida 18 yoshli chechen qochqini tomonidan oʻldirilgan edi.
Le-Fogada oʻqituvchining hamkasblari oʻtgan juma kuni sodir boʻlgan voqea sababli dushanba kuni ishga chiqishmadi.
Tuluza taʼlim boshqarmasi boshligʻi Karim Benmiludning soʻzlariga koʻra, tahdid erkak maktabga suhbat uchun chaqirilganidan keyin yangragan.
Le-Foga meri Jan-Mari Pyuig BFMTV telekanaliga bergan intervyusida erkakning oʻgʻli darsda tartibni buzganini va oʻqituvchi uni tinchlanishi uchun boshqa sinfga yuborganini, biroq u u yerda ham oʻzini yomon tutishda davom etganini aytdi.
BFMTV xabariga koʻra, oʻsha sinfdagi oʻqituvchi bolaga "oʻzingni bezoridek tutishni bas qil" degan.
Shundan soʻng unga otasi tomonidan tahdid qilingan. Merning soʻzlariga koʻra, ota uni "maktab tashqarisida kutib turgan va agar u erkak kishi boʻlganida, boshini kesib tashlashi bilan tahdid qilgan".
Keyinchalik ota uzr soʻragan, biroq sudga shikoyat arizasi kiritilgan va u payshanba kuni tushdan keyin Tuluza prokurori huzurida hozir boʻlgan.
Iyul oyida qabul qilingan farmon taʼlim organlari aralashgan va xodimlar uchun jiddiy xavf mavjud boʻlgan holatlarda oʻquvchini boshqa maktabga oʻtkazishga ruxsat beradi.
Endilikda bola va uning singlisi Le-Fogadan tashqaridagi boshqa maktabga oʻtkazilishi mumkinligi taxmin qilinmoqda.