Fransiya afğon migrantlarini deportatsiya qilişni «Tolibon» bilan muhokama qilmoqda

Fransiya afğon migrantlarini deportatsiya qilish masalasini «Tolibon» bilan muhokama qilmoqda

DW yozishicha, Fransiya ichki ishlar vaziri Loran Nunyes 2-noyabr kuni parlamentdagi chiqishida muzokaralar olib borilayotganini maʼlum qilgan.

«Biz mamlakatda noqonuniy turgan ayrim afğonlarni qaytarish imkoniyatiga erishishga harakat qilmoqdamiz. Gap texnik muhokamalar haqida ketmoqda», - deya vazirning so‘zlarini keltirgan AFP agentligi.

Nunyesning taʼkidlashicha, Yevropaning boshqa davlatlari, jumladan, Germaniya ham toliblar bilan shunday aloqalarni saqlab turibdi.

Asosiy eʼtibor jinoyat uchun sudlanganlarni qaytarishga qaratilgan

Fransiya «Tolibon» 2021-yilda Afg‘onistonda hokimiyatni qayta egallaganidan keyin tuzilgan hukumatni rasman tan olmagan. Ikki tomon o‘rtasida diplomatik munosabatlar ham mavjud emas.

Shunga qaramay, AFP maʼlumotiga ko‘ra, Fransiya afg‘on fuqarolarini vataniga qaytarishni tezlashtirish tarafdori bo‘lgan Yevropa Ittifoqining qariyb 20 davlati qatoriga kiradi. Ular orasida Germaniya, Belgiya va Shvetsiya ham bor.

Bu davlatlar, birinchi navbatda, jinoyat sodir etgani uchun sudlangan afg‘on fuqarolarini qaytarishga intilmoqda.

Nunyes Fransiyada bo‘lib turgan ayrim afg‘onlar «jamoat tartibiga tahdid solishi mumkin»ligini aytgan. Shu sababli ularni deportatsiya qilish hukumatning ustuvor vazifalaridan biri ekanini bildirgan.

Muzokaralar Fransiya muxolifatining tanqidiga sabab bo‘lgan. «Ekologlar» partiyasi deputati Lea Balaj El-Mariki hukumatni toliblar bilan «diplomatik munosabatlarni normallashtirish» jarayonini boshlashda ayblagan.

Deputatning so‘zlariga ko‘ra, toliblar «gender aparteidi» siyosatini yuritib, insoniyatga qarshi jinoyatlar sodir etmoqda. U shunday hukumat bilan munosabatlarni normallashtirishga eʼtiroz bildirgan.

Sentabr oyida BMTning inson huquqlari bo‘yicha oliy komissari Folker Tyurk odamlarni Afg‘onistonga majburan qaytarishni to‘xtatishga chaqirgan edi.