Firibgarlik boʻlmagan £70 qaytarish haqidagi xat

Firibgarlik boʻlmagan 70 funt sterlinglik pul qaytarilishi haqidagi xat

Siz pensiya toʻlovlariga qoʻshimcha olish huquqiga ega ekanligingizni tushuntiruvchi xat oladigan bir million kishidan (asosan ayollar) biri boʻlishingiz mumkin — va bu firibgarlik emas.

Bunga haqli boʻlganlar — oʻz pensiyalarining yuritilishi tizimi tufayli puldan mahrum boʻlgan kam daromadli xodimlardir.

Yaqin bir necha oy ichida Buyuk Britaniya Qirollik soliq va bojxona boshqarmasi (HMRC) odamlarga toʻlovni qanday talab qilib olishni tushuntiruvchi xatlar yuboradi. Aksariyat hollarda bu summa 70 funt sterlingni tashkil etadi, garchi u individual sharoitlarga qarab sezilarli darajada farq qilishi mumkin.

Talabga javob beradigan har bir kishi bilan avtomatik tarzda bogʻlanishadi, ammo agar siz xat olsangiz, uning haqiqiyligini tasdiqlash va aldanib qolmaslik uchun bir nechta tekshiruvlarni amalga oshirishingiz mumkin.

Pensiya jamgʻarmasiga badal toʻlaganingizda, davlat soliqqa ketishi kerak boʻlgan pulning bir qismini pensiyangizga oʻtkazishga ruxsat beradi.

Bu soliq imtiyozi deb ataladi

Murakkab sabablarga koʻra, ish beruvchisi Net Pay Arrangement (Sof ish haqi boʻyicha kelishuv) deb nomlanuvchi pensiya tizimidan foydalangan ayrim kam daromadli xodimlar, pensiyalari Relief at Source (Manbada imtiyoz qoʻllash) tizimi orqali rasmiylashtirilganlarga qaraganda kamroq mablagʻ olishgan.

Ishchilar qaysi tizimdan foydalanishni oʻzlari tanlamaydilar, shuning uchun davlat puldan mahrum boʻlganlar uchun ushbu farqni kam daromadli xodimlarning pensiya toʻlovi deb ataladigan tizim orqali qoplab berishga qaror qildi.

Odatda, ular yiliga taxminan 12 570 funt sterling atrofida (lekin undan koʻp emas) daromad olgan boʻladilar, bu daromad soligʻi toʻlash uchun belgilangan eng kam chegaradir.

Qoʻshimcha toʻlovlar dastlab 2024-25 soliq yili uchun amalga oshiriladi, keyingi yillar uchun esa avtomatik toʻlovlar boshlanadi.

Mijozlar ariza topshirishlari shart emas. Agar siz ushbu toʻlovni olishga haqli boʻlsangiz, HMRC — Buyuk Britaniya soliq idorasi — sizga maʼlumotni xat orqali yoki shaxsiy soliq kabinetingiz orqali yuboradi.

HMRC bu haqda sizga SMS, elektron pochta yubormaydi yoki telefon qilmaydi. Agar sizga shunday qoʻngʻiroq yoki xabar kelsa, bu firibgarlikdir. Shuningdek, ular hech qachon sizdan pul oʻtkazishni, PIN-kodlar yoki parollarni soʻramaydi.

Aloqaning haqiqiyligini tekshirishning boshqa usullari quyidagilardan iborat:

HMRC ixtiyorida sizning amaldagi manzilingiz borligiga ishonch hosil qilish

Gov.uk saytidan "check if a letter you've received from HMRC is genuine" (HMRCdan olgan xatingiz haqiqiyligini tekshirish) deb qidirish va "Low Earner's Pension Payment" (Kam daromadli xodimning pensiya toʻlovi) boʻlimini topish

HMRC shuningdek, firibgarlikni aniqlash boʻyicha yoʻriqnomalarni ham taklif etadi

Mijozlardan bank maʼlumotlarini shaxsiy soliq kabineti orqali taqdim etish soʻraladi. Raqamli xizmatlardan foydalana olmaydiganlar esa toʻlovni qabul qilish uchun HMRCga telefon qilishlari mumkin boʻladi.

"Biz baʼzi odamlar kutilmagan aloqadan xavsirashlari mumkinligini bilamiz, shuning uchun nimalarni kutish kerakligi va aloqaning haqiqiyligini qanday tekshirish haqida aniq maʼlumot beramiz", dedi HMRC vakili.

"Mijozlar xatning haqiqiyligini Gov.uk saytida tekshirishlari mumkin va faqat rasmiy HMRC kanallari orqali javob berishlari kerak."

LCP pensiya konsalting kompaniyasi hamkori va sobiq pensiya vaziri ser Stiv Uebb hukumat ushbu toʻlovni haqiqatda oladi deb taxmin qilayotgan odamlar soni juda kamligidan hayratda ekanini aytdi.

Hukumat hisob-kitoblariga koʻra, loyiha xarajatlari talabga javob beradigan har bir kishi toʻlovni talab qilgan taqdirdagidan ancha kam boʻladi.

"Ushbu toʻlovlarni tegishli odamlarga yetkazish jarayoni juda qiyin kechadi va toʻlovlarni ololmay qolish xavfi juda yuqori", dedi u.

"Odamlar oʻzlariga tegishli boʻlgan pulni olishlarini taʼminlash uchun axborot almashinuvi samarali boʻlishi juda muhimdir."

HMRC ijtimoiy tarmoqlar va boshqa kanallar orqali aholini xabardor qilish kampaniyasini boshlashini maʼlum qildi.