Filippinning sobiq prezidenti Duterte Xalqaro jinoiy sudda ilk bor shaxsan koʻrinish berdi
U giyohvandlikka qarshi urushi bilan bogʻliq minglab oʻlimlar tufayli insoniyatga qarshi jinoyatlarda ayblanib, sud qilinishi kutilmoqda.
Filippinning sobiq prezidenti Duterte Xalqaro jinoiy sudda ilk bor shaxsan koʻrinish berdi
Rodrigo Duterte 2025 yilning martidan buyon Gaagada hibsda ushlab turilibdi
Filippinning sobiq prezidenti Rodrigo Duterte Gaagadagi Xalqaro jinoiy sudda shaxsan hozir boʻldi, bu yerda u insoniyatga qarshi sodir etilgan jinoyatlarda ayblanib, sud oldida javob berishi kutilmoqda.
U giyohvand moddalarga qarshi olib borgan qonli urushi bilan bogʻliq ayblovlarga duch kelmoqda, bu urush natijasida oʻn minglab mayda giyohvand moddalar sotuvchilari sudsiz qatl etilgani aytiladi.
81 yoshli sobiq rahbar chorshanba kuni toʻq rangli kostyum va boʻyinbogʻsiz oq koʻylakda yetib keldi. Bu uning 18 oy oldin Manilada hibsga olinganidan beri ilk bor shaxsan koʻrinish berishidir.
Shu paytgacha u sudda faqat videoaloqa orqali qatnashgan va keyinchalik bir nechta sud majlislarini oʻtkazib yuborgan edi.
Dutertening advokatlari sobiq rahbarning sogʻligʻi yomonlashgani sababli sud jarayoniga layoqatsiz boʻlib qolganini aytganidan soʻng, Xalqaro jinoiy sud chorshanba kuniga maqomni aniqlash boʻyicha eshituv tayinladi. Birinchi sud kuni noyabr oyiga belgilangan.
Giyohvand moddalarga qarshi urush Dutertening 2016 yildan 2022 yilgacha davom etgan prezidentlik davrining asosiy xususiyati boʻlgan edi. U iqtisodiy oʻsishni qoʻllab-quvvatlash uchun tinchlik va tartib zarurligini aytgan.
Xalqaro jinoiy sud 2011 yil 1 noyabrdan — Duterte janubdagi yirik Davao shahri meri boʻlgan davrdan boshlab, 2019 yil 16 martgacha — u Filippinni XJS aʼzoligidan chiqarib yuborgan davrgacha boʻlgan qotilliklarni oʻrganmoqda.
Dutertening advokati Piter Xeyns sudga uning himoyasi ostidagi shaxsda «xotiraning jiddiy buzilishi» borligini va bu unga yuridik guruhi bilan ishlashga xalaqit berayotganini aytdi. Prokurorlar bu daʼvoni rad etishdi.
2019 yilda, hali prezidentlik davrida, Duterte oʻzida asab tizimi faoliyatining buzilishiga olib keladigan autoimmun kasallik — miasteniya borligini maʼlum qilgan edi. 2016 yilda 71 yoshida u oʻsha paytgacha saylangan eng keksa Filippin prezidenti boʻlgan.
Duterte XJSda sud jarayoniga duch kelayotgan bir paytda, uning oilasi Filippin ustidan nazorat oʻrnatish uchun yuqori darajadagi sulolaviy kurashga kirishgan. Uning qizi, vitse-prezident Sara Duterte prezident Ferdinand «Bongbong» Markos bilan keskin ravishda yuz koʻrinishmas boʻlib qolgan.
2022 yilgi saylovlarda yirik gʻalabani taʼminlashga yordam bergan Duterte-Markos ittifoqining parchalanishi 2025 yil mart oyida Manila aeroportida Rodrigo Dutertening hibsga olinishiga yoʻl ochdi.
Sara Duterte 2028 yilgi saylovlarda Markosning oʻrnini egallash uchun asosiy daʼvogar hisoblanadi, chunki amaldagi prezident konstitutsiyaga koʻra ikkinchi muddatga nomzodini qoʻya olmaydi.
Biroq, u impichment sudida oʻz siyosiy kelajagi uchun ham kurashmoqda, u yerda aybdor deb topilish uni davlat lavozimlariga nomzod boʻlish huquqidan mahrum qiladi.
U davlat mablagʻlarini notoʻgʻri sarflashda hamda Markos, birinchi xonim Liza Araneta-Markos va Markosning amakivachchasi, kongressmen Ferdinand Martin Romualdesni oʻldirish bilan tahdid qilishda ayblanmoqda.
Dutertening XJS hibsxonasidagi birinchi kechasi sud uchun muhim burilish pallasidir