Favvoralar, koʻchalarni tozalash va chiqindilarni qisqartirish. Oʻzbekistonda havo ifloslanishiga qarshi qanday kurashishga qaror qilindi

Favvoralar, koʻchalarni tozalash va chiqindilarni kamaytirish. Oʻzbekistonda havo ifloslanishiga qarshi kurashishga qanday qaror qilindi

Toshkent va viloyatlarda maxsus komissiya koʻchalarni qum va changdan tozalash, shuningdek, shahar favvoralari ishlashini taʼminlashni topshirdi. Bu qaror havo sifatining yomonlashgani bilan bogʻliq: 28 oktyabr oqshomida poytaxtda uning holati "nosogʻlom" deb baholandi.

Komissiya maʼlumotlariga koʻra, ifloslanishga tundagi harorat inversiyasi, quruq havo, yogʻingarchilikning yoʻqligi va shamolning sustligi taʼsir qilmoqda, buning oqibatida chiqindilar shahar tepasida toʻplanib qolmoqda.

Bundan tashqari, 30 ta yirik qurilish tashkiloti ogohlantirish oldi. Ularga chang va qum zarrachalarining koʻtarilishini kamaytirish choralarini koʻrish topshirildi. Toshkent va yon-atrofdagi tumanlardagi yettita issiqlik elektr stantsiyasi hamda 131 ta yirik korxonaga chiqindilarni yarmiga kamaytirish majburiyati yuklandi.

Ifloslanishni nazorat qilish maxsus mobil laboratoriya tomonidan olib borilmoqda, u korxonalardan atmosferaga chiqarilayotgan zararli moddalar hajmini tekshiradi.

Havo sifati yomonlashgan davrda bolalar, keksalar, homilador va emizukli ayollar, shuningdek, yurak va nafas olish aʼzolari kasalliklari bor kishilarga koʻchada uzoq vaqt boʻlmaslik, jismoniy faollikni cheklash va himoya niqoblaridan foydalanish tavsiya etiladi.

Bundan tashqari, Toshkentda ixtisoslashtirilgan atmosfera laboratoriyasi ishlamoqda, u yerda havo tarkibi oʻrganilib, ifloslanishning asosiy manbalari aniqlanmoqda. Bu zararli aralashmalarning toʻplanishiga qaysi omillar taʼsir qilishini va ularga qarshi qanday kurashish kerakligini tushunishga yordam beradi.