Fargʻonalik ikki ayolni fohishalik bilan shugʻullanish uchun Moskvaga yubormoqchi boʻlishdi
Fargʻonalik ikki ayolni fohishalik bilan shugʻullanish uchun Moskvaga yuborishga urinishdi
Fargʻonada DXX va IIB xodimlari odam savdosiga chek qoʻyishdi. Jinoyatchi ikki ayolga intim xizmatlar koʻrsatish orqali pul topishni taklif qilib, ularni Moskvaga yubormoqchi boʻlgan.
Huquq-tartibot idoralari maʼlumotlariga koʻra, Fargʻonada yashovchi, muqaddam sudlangan 33 yoshli erkak ikki ayolga Rossiya poytaxtiga borishni va u yerda intim xizmatlar koʻrsatish orqali pul ishlashni taklif qilgan.
Erkak ularning aviachiptalarini oʻz hisobidan toʻlab berishni vaʼda qilgan. Buning evaziga Moskvaga yetib borgach, ishlab topilgan pulning yarmini unga berishni talab qilgan.
Jinoiy reja tezkor tadbir davomida barbod qilindi. Erkak Fargʻona xalqaro aeroportida ayollarni Moskvaga yuborayotgan vaqtida qoʻlga olindi.
Gumonlanuvchiga nisbatan jinoyat ishi qoʻzgʻatilgan. Tergov harakatlari olib borilmoqda. Huquq-tartibot idoralari xodimlari voqeaning barcha tafsilotlarini aniqlamoqda.
Bu ayollarni fohishalik bilan shugʻullanish uchun boshqa mamlakatlarga yuborishga boʻlgan muvaffaqiyatsiz urinishlarning birinchisi emas — avvalroq huquq-tartibot idoralari xodimlari ularni Turkiyaga olib chiqib ketish boʻyicha bir nechta urinishlarning oldini olishgan edi.