Fargʻona viloyati va ShinWon Corporation toʻqimachilik sohasidagi loyihalarni muhokama qildi
Xayrullo Bozorov va ShinWon Corporation Fargʻona viloyatida kiyim-kechak ishlab chiqarishni rivojlantirish, eksport va investitsiyaviy hamkorlikni muhokama qildilar.
Fargʻona viloyati va ShinWon Corporation toʻqimachilik sohasidagi loyihalarni muhokama qildi
Fargʻona viloyati va Janubiy Koreyaning ShinWon Corporation kompaniyasi investitsiyaviy hamkorlik va tayyor toʻqimachilik mahsulotlari ishlab chiqarishni rivojlantirish istiqbollarini koʻrib chiqdi. Hamkorlik masalalarini viloyat hokimi Xayrullo Bozorov kompaniyaning sanoat strategiyasi boʻyicha vitse-prezidenti Sung Xvan bilan muhokama qildi.
Tomonlar yuqori qoʻshilgan qiymatga ega tayyor mahsulotlar ishlab chiqarishni koʻpaytirish, eksportni oshirish hamda toʻqimachilik va tikuv-trikotaj sanoatida qoʻshma investitsiya loyihalarini amalga oshirish uchun hududning ishlab chiqarish salohiyatidan foydalanish imkoniyatlarini koʻrib chiqdilar.
ShinWon Corporation vakillariga Fargʻona viloyati toʻqimachilik tarmogʻining ishlab chiqarish bazasi, malakali kadrlar mavjudligi va keyinchalik tashqi bozorlarga chiqqan holda tayyor kiyim-kechak ishlab chiqarishni yanada kengaytirish imkoniyatlari toʻgʻrisida maʼlumotlar taqdim etildi.
Muzokaralar davomida tayyor kiyim-kechak ishlab chiqarishda zamonaviy texnologiyalar va xalqaro standartlarni qoʻllash, hudud korxonalarini xalqaro yetkazib berish zanjirlariga integratsiya qilish hamda mahsulotlarni xorijiy bozorlarga yetkazib berishni kengaytirishga alohida eʼtibor qaratildi.
ShinWon Corporation kiyim-kechak ishlab chiqarish, moda industriyasi va eksportga ixtisoslashgan. Kompaniya erkaklar, ayollar va bolalar uchun kiyim-kechak ishlab chiqaradi, shuningdek, xalqaro buyurtmachilarga OEM va ODM modellari boʻyicha ishlab chiqarish xizmatlarini koʻrsatadi. Uning mahsulotlari dunyoning 40 dan ortiq mamlakatiga yetkazib beriladi. Bundan tashqari, kompaniya Koreya Respublikasining ichki bozorida oʻz moda brendlarini rivojlantirmoqda.
Xayrullo Bozorov Fargʻona viloyatida xorijiy investorlar uchun yaratilgan sharoitlarni qayd etib, viloyat ShinWon Corporation bilan oʻzaro manfaatli loyihalarni amalga oshirishga koʻmaklashishga tayyorligini bildirdi.
Uchrashuv yakunlari boʻyicha tomonlar hamkorlikning istiqbolli yoʻnalishlarini batafsil oʻrganish va sheriklik masalalari boʻyicha amaliy muloqotni davom ettirishga kelishib oldilar.