Eron AQSHga Hurmuz bo‘g‘ozini ochish shartlarini maʼlum qildi
Eron AQSHdan urushni yakunlash, muzlatilgan aktivlarni qaytarish va mintaqadagi harbiy harakatlarni to‘xtatishni talab qilmoqda.
Eron AQSHga Hurmuz bo‘g‘ozini ochish uchun qo‘yiladigan shartlarni maʼlum qildi. Bu haqda Press TV xabar berdi.
Eron Xavfsizlik kengashi kotibi Muhsin Rezoiyning so‘zlariga ko‘ra, Tehron Vashingtonga vositachilar orqali Hurmuz bo‘g‘ozini ochish uchun bajarilishi lozim bo‘lgan shartlarni yetkazgan.
Rezoiyning taʼkidlashicha, Tehron AQSHdan urushni tugatish, Eronning muzlatilgan aktivlarini qaytarish, shuningdek, butun mintaqada, jumladan, Livan va G‘azo sektorida harbiy harakatlarni to‘xtatishni talab qilmoqda.
Eron Xavfsizlik kengashi kotibi AQSH o‘z siyosatini o‘zgartirib, Tehron takliflarini qabul qilmaguncha, bo‘g‘oz ochilmasligini bildirdi.
Avvalroq Eron parlamenti Milliy xavfsizlik qo‘mitasi Hurmuz bo‘g‘ozi orqali kemalar harakatini tartibga solishni nazarda tutuvchi yangi qonun loyihasini maʼqullagan edi. Ushbu hujjatda AQSH va Isroil kemalarining bo‘g‘oz orqali o‘tishi taqiqlanishi ko‘zda tutilgan.
Xabarda keltirilgan maʼlumotlarga ko‘ra, iyun oyi o‘rtalarida Vashington va Tehron tinchlik kelishuvini tuzish jarayonini boshlashi kerak bo‘lgan memorandumni imzolagan. Biroq uch hafta o‘tib, tomonlar yana mojaroni keskinlashtirishga o‘tgan.
Avgust oyi boshida Donald Tramp kutilayotgan kelishuv munosabati bilan Eronga qarshi navbatdagi hujumlar to‘lqini bekor qilinganini maʼlum qildi.
Shuningdek, u Hurmuz bo‘g‘ozi yaqin vaqt ichida ochilishi kerakligini bildirib, bu shart bajarilmasa, hujumlarni qayta boshlash bilan tahdid qildi.