Erkak Janubiy Afrika prezidentiga tegishli fermadan naqd pul oʻgʻirlaganlikda aybdor deb topildi

Janubiy Afrika prezidentiga tegishli fermadan naqd pul oʻgʻirlagan erkak aybdor deb topildi

Janubiy Afrika prezidenti Siril Ramafosa hech qanday noqonuniy ish qilmaganini taʼkidlagan

Janubiy Afrikadagi sud mamlakat prezidenti Siril Ramafosaga tegishli fermadan 500 000 dollardan (£372 822) ortiq naqd pulni oʻgʻirlagan erkakni aybdor deb topdi. Ushbu ish davlat rahbarini impichment mashmashasiga tortib kegan edi.

Imanuela David dushanba kuni 2020 yilda Limpopo provintsiyasidagi Phala Phala fermasida oʻgʻrilik qilish, shuningdek, oʻgʻrilik maqsadida uyga gʻayriqonuniy kirish uchun til biriktirishda aybdor deb topildi.

Mulk farroshi Froliana Jozef ham oʻgʻrilik maqsadida uyga gʻayriqonuniy kirish uchun til biriktirishda aybdor deb topildi.

Uning akasi Ndilinasho Jozef esa barcha ayblovlardan oqlandi.

David 2020 yilning fevral oyida qoramol fermasiga gʻayriqonuniy kirib, u yerdagi divandan 580 000 dollar (£432 000) naqd pulni olib chiqib ketganlikda ayblangan edi. ShunTopicdan soʻng u pulni ketma-ket sarflab, bir qator avtomobillar, jumladan, uchta Mercedes (ulardan biri sevgilisi uchun), Porsche, ikkita Volkswagen, shuningdek, brilliant bilan bezatilgan Rolex soatlari va uy sotib olgan.

David sudda bu pullarni olmos va Bitcoin kabi biznes faoliyati orqali topganini aytdi, ammo sud bu daʼvolarni rad etdi. Sud, shuningdek, aybdor deb topilgan ikki kishidan faqat Davidning bank hisobida oʻgʻirlangan pullar boʻlganini aniqladi.

Sud hukmidan oldingi majlis 13 noyabr kuni boʻlib oʻtadi.

"Farmgate" janjali sifatida tanilgan bu voqeada koʻplab kutilmagan burilishlar boʻlgan.

Oʻgʻrilik haqida 2022 yilgacha deyarli hech kim bilmas edi. Ushbu voqea Janubiy Afrikaning sobiq razvedka rahbari va sobiq prezident Yakob Zumaning ittifoqchisi Artur Freyzer tomonidan oshkor qilindi. U Ramafosa oʻgʻrilikni politsiya va soliq organlaridan yashirgan deb daʼvo qilgan.

Ramafosa oʻgʻrilik sodir boʻlganini tan oldi, ammo hech qanday noqonuniy ish qilmaganini taʼkidladi.

Oʻsha yili mustaqil komissiya Ramafosaning xonadonga gʻayriqonuniy kirilishi boʻyicha javob berishi kerak boʻlgan savollari boʻlishi mumkinligini aniqladi. Parlament aʼzolari impichment boʻyicha tekshiruv oʻtkazishga qarshi ovoz berishdi.

Joriy yilning may oyida Konstitutsiyaviy sud parlament komissiya hisobotini kun tartibidan olib tashlash orqali qonunga xilof ish tutgan deb topdi va iyul oyida Ramafosa provintsiya sudi orqali parlament tekshiruvini toʻxtatib qoʻydi.