Tramp Ruanda va Janubiy Afrikani AQSh savdo kelishuvidan chiqarib tashlaydi
Ushbu qadam Ruanda Mudofaa vazirligiga qarshi AQSh Moliya vazirligi tomonidan sanktsiyalar joriy etilganidan atigi bir hafta oʻtib amalga oshirildi.
Tramp Ruanda va Janubiy Afrikani AQSh savdo bitimidan chiqarish harakatini boshladi
Oʻtgan yili Tramp Oq uyda Prezident Siril Ramafosa bilan oʻtkazilgan uchrashuvda Janubiy Afrikani oq tanlilar genotsidida ayblagan edi.
AQSh prezidenti Donald Tramp Kongressga 2027 yil 1 yanvardan boshlab Janubiy Afrika va Ruandani imtiyozli savdo dasturidan chiqarishni rejalashtirayotganini maʼlum qildi.
Afrikada oʻsish va imkoniyatlar toʻgʻrisidagi qonun (Agoa) talablarga javob beradigan Afrika davlatlariga minglab turdagi tovarlarni AQShga bojsiz eksport qilish imkonini beradi.
AQSh Savdo vakili Jeymison Grir oʻz bayonotida yillik tekshiruv har ikkala mamlakat dasturga muvofiqlik qoidalariga mos kelmaydigan amaliyotlarda ishtirok etayotganini aniqlaganini aytdi.
U, shuningdek, Tramp maʼmuriyati ushbu qaror haqida har ikkala mamlakatni alohida xabardor qilganini bildirdi.
Tramp maʼmuriyati AQSh savdosi va investitsiyalariga toʻsiqlar, shuningdek, mintaqadagi milliy xavfsizlik va tashqi siyosat manfaatlariga oid xavotirlarni roʻkach qildi.
Ruanda holatida Vashington, shuningdek, inson huquqlari, siyosiy plyuralizm, qonun ustuvorligi va xodimlar huquqlari bilan bogʻliq xavotirlarni ham tilga oldi.
Bu qaror AQSh Moliya vazirligi tomonidan Ruanda Mudofaa vazirligiga qarshi Kongo Demokratik Respublikasi sharqidagi qurolli isyonga aloqadorlik ayblovi bilan sanktsiyalar joriy etilganidan atigi bir hafta oʻtib qabul qilindi.
AQSh Moliya vazirligining bildirishicha, Ruanda Mudofaa vazirligi KDR sharqidagi M23 isyonchilari bilan birgalikda jang qilish uchun minglab qoʻshinlarni yuborgan hamda ularni qurol-yarogʻ, asbob-skunotalar, logistika va mashgʻulotlar bilan taʼminlagan.
Janubiy Afrika holatida AQSh, shuningdek, korruptsiya boʻyicha ham xavotir bildirdi.
«Tramp maʼmuriyati afrikalik hamkorlarimiz muvofiqlik meʼyorlariga javob berish uchun zarur choralarni koʻrishini taʼminlash ustida ishlamoqda», dedi Grir.
Ushbu eʼlon Vashington va har ikkala mamlakat oʻrtasidagi munosabatlar taranglashgan bir paytda berildi va rejalashtirilgan bekor qilish ularning AQSh bilan imtiyozli savdo kelishuvlaridan foydalanish imkoniyatiga tahdid solmoqda.
Oʻtgan yili Tramp Oq uyda Prezident Siril Ramafosa bilan uchrashuvda Janubiy Afrikani oq tanlilar genotsidida ayblagan va afrikanerlar uchun AQSh qochqinlik dasturini ishga tushirgan edi.
AQShning Janubiy Afrikadagi elchisi Leo Brent Bozell III Janubiy Afrika siyosati uning Agoa dasturidan chiqarilishiga olib kelgani afsuslanarli holat ekanini aytdi.
«Bu Janubiy Afrika hukumati tomonidan AQSh bildirgan real xavotirlarning rad etilishi oqibatida yuzaga kelgan, oldindan taxmin qilish mumkin boʻlgan va oldini olish mumkin boʻlgan oqibat edi», deb yozdi u X tarmogʻida.